മാലിന്യശല്യത്താൽ പൊറുതിമുട്ടി പുല്ലംപൊയിൽ പ്രദേശവാസികൾ; നടപടിയില്ലെങ്കിൽ പ്രക്ഷോഭത്തിന് ഒരുങ്ങി നാട്ടുകാർ

പുല്ലംപൊയിൽ: മരുതോങ്കര പഞ്ചായത്തിലെ അടുക്കത്ത് നീളംപാറ പുല്ലംപൊയിൽ ഭാഗത്ത് പരസ്യമായി മാലിന്യം വലിച്ചെറിയുന്നത് പ്രദേശവാസികളുടെ ജീവിതം ദുരിതത്തിലാക്കുന്നു. സമീപത്തെ അങ്ങാടിയിൽ നിന്നുള്ള ജൈവ, അജൈവ മാലിന്യങ്ങളാണ് വ്യാപകമായി റോഡരികിലേക്ക് തള്ളുന്നത്.

​മഴക്കാലം ശക്തമായതോടെ ഈ മാലിന്യങ്ങൾ ചീഞ്ഞഴുകി കടുത്ത ദുർഗന്ധം വമിക്കുന്നതിനൊപ്പം പ്രദേശത്ത് പകർച്ചവ്യാധി ഭീഷണിയും ഉയർത്തുന്നുണ്ട്. സന്ധ്യ മയങ്ങിയാൽ കൊതുകുശല്യം കാരണം വീടുകളിൽ ഇരിക്കാൻ പോലും പറ്റാത്ത അവസ്ഥയിലാണ് ജനങ്ങൾ. അങ്ങാടിയിലെ അവശിഷ്ടങ്ങൾ ദിനംപ്രതി മലിനജലത്തിലേക്ക് ഒഴുക്കിവിടുന്നതും ഇവിടെ പതിവുകാഴ്ചയായി മാറിയിരിക്കുകയാണ്.

​മാലിന്യപ്രശ്നത്തിന് ശാശ്വത പരിഹാരം കാണണമെന്നാവശ്യപ്പെട്ട് പഞ്ചായത്ത് ഭരണസമിതിക്കും സെക്രട്ടറിക്കും നിരവധി തവണ നിവേദനങ്ങൾ നൽകിയെങ്കിലും ഇതുവരെയും യാതൊരു നടപടിയും ഉണ്ടായിട്ടില്ലെന്ന് പ്രദേശവാസികൾ കുറ്റപ്പെടുത്തുന്നു. ജനവാസമേഖലയിലെ ഈ അവഗണന അവസാനിപ്പിച്ചില്ലെങ്കിൽ വരുംദിവസങ്ങളിൽ ശക്തമായ പ്രക്ഷോഭ പരിപാടികളുമായി മുന്നോട്ട് പോകുമെന്ന് പൊതുപ്രവർത്തകൻ പി.സി. നജീബ് അറിയിച്ചു.