കായണ്ണബസാറിലെ റോഡിൽ വെള്ളക്കെട്ട്: ദുരിതത്തിലായി യാത്രക്കാരും വിദ്യാർഥികളും

കായണ്ണബസാർ: കായണ്ണ രണ്ടാം വാർഡിലെ മൂത്തുവൻ വീട്ടിൽ താഴെയുള്ള റോഡിലെ കടുത്ത വെള്ളക്കെട്ട് യാത്രക്കാരെ വലയ്ക്കുന്നു. റോഡ് താഴ്ത്തി ടാറിങ് നടത്തിയതും, മണ്ണ് വന്ന് മൂടിയതിനെ തുടർന്ന് ഓവുചാലുകൾ അടഞ്ഞതുമാണ് ഇവിടെ വെള്ളം ഒഴിഞ്ഞുപോകാതെ തളംകെട്ടി നിൽക്കാൻ കാരണം. ഇതോടെ സ്‌കൂൾ വിദ്യാർഥികൾ ഉൾപ്പെടെയുള്ള കാൽനടയാത്രക്കാർ ചെളിവെള്ളത്തിലൂടെ നടക്കേണ്ട അവസ്ഥയിലാണ്.

​റോഡിലെ വളവിൽത്തന്നെ വെള്ളക്കെട്ടുള്ളത് ഇരുചക്ര വാഹനയാത്രക്കാർക്കും വലിയ അപകടഭീഷണിയാണ് ഉയർത്തുന്നത്. മഴക്കാലത്ത് കാൽ വഴുതി പലരും ഇവിടെ ചെളിയിൽ വീണിട്ടുമുണ്ട്. മഴ ശക്തമാകുമ്പോൾ റോഡിൽ വെള്ളമുയരുന്നതിനാൽ തപ്പിത്തടഞ്ഞ് നടക്കേണ്ട ഗതികേടിലാണ് പ്രദേശവാസികൾ. ഓവുചാലുകൾ താൽക്കാലികമായെങ്കിലും തുറന്നു കൊടുത്താൽ ഈ വെള്ളക്കെട്ടിന് വലിയൊരു പരിഹാരമാകുമെന്നും, അധികൃതർ എത്രയും വേഗം ഇടപെട്ട് ഈ യാത്രാക്ലേശം പരിഹരിക്കണമെന്നും നാട്ടുകാർ ആവശ്യപ്പെടുന്നു.