അഴിയൂരിൽ കെ റെയിൽ വിരുദ്ധ സമരസമിതി പ്രവർത്തകർ ആഹ്ലാദത്തിമിർപ്പിൽ.

കെ 'റെയിൽ സിൽവർ ലൈൻ വിരുദ്ധ ജനകീയ സമര സമിതി കെ റെയിൽ പദ്ധതി മരവിപ്പിച്ചത് അറിഞ്ഞ് മുക്കാളി ടൗണിൽ ആഹ്ലാദ പ്രകടനവും പൊതുയോഗവും നടത്തി.

ഇന്ന് കാലത്ത് ബഹുമാനപ്പെട്ട കേരള മുഖ്യമന്ത്രി ശ്രീ.വി.ഡി. സതീശൻ്റെ വാർത്താ സമ്മേളനത്തിൽ കെറെയിൽ പദ്ധതി മരവിപ്പിച്ചും സിൽവർ ലൈൻ അലൈൻമെൻ്റിനായി കേന്ദ്ര സർക്കാരിൻ്റെ അനുമതി പോലും ലഭിക്കാതെ നാട്ടിയ മഞ്ഞക്കുറ്റികൾ നീക്കം ചെയ്യുമെന്നും സമരക്കാർക്കെതിരെ ചുമത്തിയ കള്ളക്കേസുകൾ പിൻവലിക്കുമെന്നും ഉള്ള കാബിനറ്റ് തീരുമാനം അറിയച്ചതോടെ അഴിയൂർ മേഖല കെ റെയിൽ വിരുദ്ധ ജനകീയ സമരസമിതി ആഹ്ലാദത്തിലായിരുന്നു.

ഇന്ന് വൈകുന്നേരം 5 മണിക്ക് മുക്കാളി ടൗണിൽ വിവിധ രാഷ്ട്രിയ കക്ഷികൾ ഉൾപ്പെടുന്ന സിൽവർ ലൈൻ വിരുദ്ധ ജനകീയ സമര സമിതി ആഹ്‌ളാദ പ്രകടനവും പൊതുയോഗവും സംഘടിപ്പിച്ചു.

ആഹ്ലാദ പ്രകടനത്തിന് ശേഷം നടന്ന പൊതുയോഗത്തിൽ സമരസമിതി അഴിയൂർ മേഖല കമ്മിറ്റി കൺവീനർ പാമ്പള്ളി ബാലകൃഷ്ണൻ സ്വാഗതം പറഞ്ഞു. സമരസമിതി അഴിയൂർ മേഖല കമ്മിറ്റി ചെയർമാൻ ചെറിയ കോയ തങ്ങൾ അദ്ധ്യക്ഷം വഹിച്ചു.