ചോറോടിൽ റെയിൽവേ ട്രാക്കിന് കുറുകെ സ്റ്റീൽ പാലം ഉയരുന്നു: ട്രാക്കൊരുക്കൽ പൂർത്തിയായി

വടകര: ദേശീയപാത വികസനത്തിന്റെ ഭാഗമായി ചോറോടിൽ റെയിൽവേ ട്രാക്കിന് കുറുകെ ബോസ്ട്രിങ് സ്റ്റീൽ പാലം സ്ഥാപിക്കുന്നതിനുള്ള സുപ്രധാന ഘട്ടം ആരംഭിച്ചു. റോളറുകൾ വഴി പാലം ഉരുട്ടി ട്രാക്കിന് മുകളിലെത്തിക്കുന്നതിനായി ഇരുമ്പ് ട്രാക്കുകൾ സ്ഥാപിക്കുന്ന ജോലികളാണ് ബുധനാഴ്ച രാത്രിയോടെ പൂർത്തിയായത്. റെയിൽവേ ഉദ്യോഗസ്ഥരുടെ നേരിട്ടുള്ള മേൽനോട്ടത്തിൽ നടന്ന ഈ പ്രവൃത്തിയുടെ ഭാഗമായി ദേശീയപാതയിൽ ഗതാഗത നിയന്ത്രണവും ഏർപ്പെടുത്തിയിരുന്നു.

​ഏകദേശം ഒരു വർഷം മുൻപാണ് ഈ സ്റ്റീൽ പാലത്തിന്റെ ഭാഗങ്ങൾ യോജിപ്പിക്കുന്ന ജോലികൾ തുടങ്ങിയത്. റെയിൽവേയുടെ 'റിസർച്ച് ഡിസൈൻ ആൻഡ് സ്റ്റാൻഡേർഡ് ഓർഗനൈസേഷൻ' (RDSO) അംഗീകാരമുള്ള സ്പെസം എന്ന എൻജിനീയറിങ് കമ്പനിയാണ് നിർമ്മാണത്തിന് നേതൃത്വം നൽകുന്നത്. ചെലവ് കൂടുതലാണെങ്കിലും, ഭാവിയിൽ പാലത്തിന്റെ ഉയരം വർദ്ധിപ്പിക്കാനുള്ള എളുപ്പവും നിർമ്മാണ വേളയിൽ ട്രെയിൻ ഗതാഗതത്തിന് കുറഞ്ഞ നിയന്ത്രണം മാത്രം മതിയെന്നതും പരിഗണിച്ചാണ് സ്റ്റീൽ പാലം തിരഞ്ഞെടുത്തത്.

​പാലം തള്ളിനീക്കുന്നതിനുള്ള ട്രാക്കുകൾ പൂർണ്ണമായും സജ്ജമാക്കിയ ശേഷം വരുന്ന പത്താം തീയതിയാകും പാലം ട്രാക്കിന് മുകളിലേക്ക് മാറ്റുക. ഇതിനായി വലിയ ശേഷിയുള്ള രണ്ട് കൂറ്റൻ ക്രെയിനുകൾ നിലവിൽ സ്ഥലത്തെത്തിച്ചിട്ടുണ്ട്. ഈ ക്രെയിനുകൾ ഉപയോഗിച്ചാണ് കഴിഞ്ഞദിവസം ഇരുമ്പ് പാളങ്ങൾ കൃത്യമായി സ്ഥാപിച്ചത്. പാലം മാറ്റുന്ന ഘട്ടത്തിൽ മാത്രമേ തീവണ്ടി ഗതാഗതത്തിൽ കാര്യമായ നിയന്ത്രണങ്ങൾ ആവശ്യമായി വരികയുള്ളൂ. നിർമ്മാണം പൂർത്തിയാകുന്നതോടെ മേഖലയിലെ യാത്രാദുരിതത്തിന് വലിയ ആശ്വാസമാകും.