വടകരയിൽ വീട് കത്തിനശിച്ചു: സർട്ടിഫിക്കറ്റുകളും രേഖകളും ഉൾപ്പെടെ കത്തിച്ചാമ്പലായി; ലക്ഷങ്ങളുടെ നഷ്ടം

വടകര ചെമ്മരത്തൂർ കപ്പള്ളി അമ്പലത്തിന് സമീപം തൈവെച്ച പറമ്പത്ത് ബിന്ദുവിന്റെ ഉടമസ്ഥതയിലുള്ള ഇരുനില വീടിന് തീപിടിച്ച് ലക്ഷങ്ങളുടെ നാശനഷ്ടം സംഭവിച്ചു. ആയുർവേദ ആശുപത്രിക്ക് പിന്നിലായി സ്ഥിതി ചെയ്യുന്ന വീടിന്റെ മുകൾ നിലയിലാണ് അപകടമുണ്ടായത്. തീപിടുത്തം നടക്കുമ്പോൾ വീട്ടുടമസ്ഥ സ്ഥലത്തുണ്ടായിരുന്നില്ല. ഷോർട്ട് സർക്യൂട്ടാണ് അപകടത്തിന് കാരണമായതെന്നാണ് പ്രാഥമിക നിഗമനം. വീടിന്റെ മുകൾ ഭാഗത്തുനിന്ന് പുക ഉയരുന്നത് കണ്ട അയൽവാസികൾ ഉടൻതന്നെ നാട്ടുകാരെയും അഗ്നിശമനസേനയെയും വിവരമറിയിക്കുകയായിരുന്നു.

ഓട് മേഞ്ഞ മുകൾ നിലയിലെ സീലിംഗ്, ടൈലുകൾ, കിടക്ക, അലമാര, വയറിംഗ് തുടങ്ങിയവ തീപിടുത്തത്തിൽ പൂർണ്ണമായും നശിച്ചു. ബാഗിൽ സൂക്ഷിച്ചിരുന്ന പ്രധാനപ്പെട്ട സർട്ടിഫിക്കറ്റുകളും രേഖകളും കത്തിനശിച്ചത് വലിയ ആഘാതമായി. സീനിയർ ഫയർ ആൻഡ് റെസ്ക്യൂ ഓഫീസർ ഷൈനേഷ് മൊകേരിയുടെ നേതൃത്വത്തിലുള്ള സംഘവും നാട്ടുകാരും ചേർന്നാണ് തീ നിയന്ത്രണവിധേയമാക്കിയത്. റിജേഷ് കുമാർ, അഖിൽ, അർജുൻ, അഗേഷ്, ഡ്രൈവർ സുബൈർ എന്നീ ഉദ്യോഗസ്ഥർ രക്ഷാപ്രവർത്തനത്തിൽ പങ്കാളികളായി.