ലഹരിക്കും മാലിന്യത്തിനുമെതിരേ ഒറ്റക്കെട്ടാകണം -എം.ബി. രാജേഷ്

തിരുവനന്തപുരം: ഗുരുതര സാമൂഹികവിപത്തായ ലഹരിക്കും മാലിന്യത്തിനുമെതിരേ രാഷ്ട്രീയം നോക്കാതെ ഒന്നിക്കണമെന്ന് മന്ത്രി എം.ബി. രാജേഷ്. നിയമസഭയിൽ എക്സൈസ്, തദ്ദേശവകുപ്പുകളുടെ ധനാഭ്യർഥനചർച്ചയ്ക്ക് മറുപടി പറയുകയായിരുന്നു മന്ത്രി.

സർക്കാർ അധികാരത്തിൽ വന്നശേഷം 26,454 എൻഡിപിഎസ് കേസുകളും 72,755 അബ്കാരി കേസുകളും എടുത്തു. 2023-ൽ 4998 പേരെ ശിക്ഷിച്ചു. ശിക്ഷാനിരക്ക് 98.34 ശതമാനം. 2024-ൽ 4473 പേരെ ശിക്ഷിച്ചു. ശിക്ഷാനിരക്ക് 96.5 ശതമാനം. ദേശീയശരാശരി 75 ശതമാനംമാത്രമാണ്.

തദ്ദേശസ്ഥാപനങ്ങൾക്ക് 2010-2011-ൽ നൽകിയ ബജറ്റ് വിഹിതം 20.45 ശതമാനമായിരുന്നു. 2025-2026-ൽ 28.35 ശതമാനമാക്കി. ബ്രഹ്‌മപുരത്തുനിന്ന് എട്ടുലക്ഷം ടൺ മാലിന്യത്തിൽ ആറുലക്ഷം ഇതിനകം നീക്കി. മേയ് മാസത്തോടെ പൂർണമായും നീക്കും. അവിടെ പൂങ്കാവനത്തിൻ്റെ നിർമാണം തുടങ്ങി. 150 ടൺ മാലിന്യം ബയോഗ്യാസാക്കി ബിപിസിഎൽ കമ്പനിയിലെത്തിക്കുന്ന പദ്ധതി ഏപ്രിലിൽ പ്രാവർത്തികമാക്കും.

കെട്ടിടനിർമാണച്ചട്ടങ്ങൾ ലളിതമാക്കാൻ 102 ഭേദഗതി കൊണ്ടുവരുമെന്നും അദ്ദേഹം അറിയിച്ചു.