മൂന്നാർ ടീ മ്യൂസിയത്തിന് സമീപം വിരിക്കൊമ്പൻ

മൂന്നാർ: തിരക്കേറിയ നല്ലതണ്ണി ടീ മ്യൂസിയത്തിന് സമീപം കാട്ടാനയെത്തിയത് ഭീതിപരത്തി. ചൊവ്വാഴ്‌ച രാവിലെയാണ് സംഭവം. പതിവായി നാശനഷ്ടമുണ്ടാക്കുന്ന വിരിക്കൊമ്പനാണ് ഏഴോടെ പ്രദേശത്തെത്തിയത്.

ഏറെനേരം റോഡിൽ നടന്ന ആന വാഹനങ്ങൾ തടഞ്ഞു. പിന്നീട് ടീ മ്യൂസിയത്തിന് സമീപത്ത് നിലയുറപ്പിച്ചു. ലിറ്റിൽ ഫ്ലവർ ഹൈസ്‌കൂൾ ഇതിന് തൊട്ടടുത്താണുള്ളത്. സ്‌കൂൾ സമയമല്ലാതിരുന്നതിനാൽ അപകടമൊഴിവായി.

നിരവധി തൊഴിലാളി ലയങ്ങളും മറ്റ് സ്ഥാപനങ്ങളും ഈ ഭാഗത്തുണ്ട്. ഏറെ നേരം റോഡിൽ നടന്നെങ്കിലും വിരിക്കൊമ്പൻ ആക്രമണത്തിന് മുതിർന്നില്ല. പിന്നീട് വനം വകുപ്പിൻ്റെ ദ്രുതകർമസേന ആനയെ കാട്ടിലേക്ക് തുരത്തി.