വിദ്യാർഥികളിൽ സമ്പാദ്യശീലം വളർത്തണം - കളക്ടർ

മലപ്പുറം: സ്‌കൂൾ വിദ്യാർഥികളിൽ സമ്പാദ്യശീലം വളർത്തണമെന്ന് കളക്ടർ വി.ആർ. വിനോദ്. ദേശീയ സമ്പാദ്യ പദ്ധതിയിൽ കൂടുതൽ തുക സമാഹരിച്ച സ്കൂളുകളെയും മുതിർന്ന ഏജന്റുമാരെയും ആദരിക്കുന്ന പരിപാടി ഉദ്ഘാടനംചെയ്യുകയായിരുന്നു അദ്ദേഹം.

ബാങ്കിങ് മേഖലയെ പരിചയപ്പെടാനും സുരക്ഷിതമായ നിക്ഷേപത്തിനും സമ്പാദ്യപദ്ധതി കുട്ടികളെ പ്രാപ്‌തരാക്കുന്നതോടൊപ്പം സമ്പദ് വ്യവസ്ഥയിൽ ഗുണകരമായ മാറ്റമുണ്ടാക്കുമെന്നും അദ്ദേഹം പറഞ്ഞു. ദേശീയ സമ്പാദ്യ പദ്ധതി ഡെപ്യൂട്ടി ഡയറക്‌ടർ എം. ഉണ്ണികൃഷ്‌ണൻ അധ്യക്ഷനായി. കൂടുതൽ കുട്ടികളെ സമ്പാദ്യപദ്ധതിയിൽ അംഗമാക്കിയ തേഞ്ഞിപ്പലം എ.യു.പി. സ്കൂ‌ളിനും കൂടുതൽ നിക്ഷേപം ലഭിച്ച കുന്നപ്പള്ളി എ.എം.യു.പി. സ്കൂ‌ളിനും കളക്‌ടർ ട്രോഫി കൈമാറി. എഴുപത് വയസ്സ് പൂർത്തിയാക്കിയ എം.പി.എസ്.കെ.ബി.വൈ., എസ്.എ.എസ്. ഏജൻ്റുമാരെ ആദരിച്ചു. വിദ്യാഭ്യാസ ഉപഡയറക്ട‌ർ കെ.പി. രമേഷ് കുമാർ, ജില്ലാ ട്രഷറി ഓഫീസർ എം.കെ. സ്‌മിജ, ദേശീയ സമ്പാദ്യ പദ്ധതി അസി. ഡയറക്‌ടർ ജിതിൻ കെ. ജോൺ, ഗ്രേഡ് അസിസ്റ്റന്റ് ആർദ്ര ചന്ദ്രൻ എന്നിവർ പ്രസംഗിച്ചു.