വേദനയ്ക്കിടെ ആശ്വാസമായി സന്ദർശനം

മാനന്തവാടി: കടുവയുടെ ആക്രമണത്തിൽ മരിച്ച പിലാക്കാവ് പഞ്ചാരക്കൊല്ലി തറാട്ട് രാധയുടെ കുടുംബത്തിന് ആശ്വാസമായി പ്രിയങ്കാ ഗാന്ധി എം.പി.യുടെ സന്ദർശനം. രാധയുടെ വീടിൻ്റെ പണി പൂർത്തിയാക്കിക്കൊടുക്കുമെന്ന് ഉറപ്പുനൽകിയാണ് പ്രിയങ്കാ ഗാന്ധി മടങ്ങിയത്.

തിങ്കളാഴ്‌ച ഉച്ചയ്ക്ക് 1.12-ഓടെ രാധയുടെ വീട്ടിലെത്തിയ പ്രിയങ്കാ ഗാന്ധി കുടുംബാംഗങ്ങളുമായി അരമണിക്കൂറോളം സംസാരിച്ചു. കുടുംബത്തിന് സാധ്യമായ എല്ലാ സഹായവും അവർ വാഗ്‌ദാനംചെയ്‌തു. രാധയുടെ വീടിന്റെ പണി പൂർത്തിയാക്കിക്കൊടുക്കുമെന്നും കിണർ കുഴിച്ചുകൊടുക്കുമെന്നും എം.പി. ഉറപ്പുനൽകിയതായി മാനന്തവാടി ബ്ലോക്ക് കോൺഗ്രസ് കമ്മിറ്റി പ്രസിഡന്റ് എ.എം. നിശാന്ത് പറഞ്ഞു.

പ്രിയങ്കാ ഗാന്ധി വീട്ടിലെത്തിയത് വളരെ ആശ്വാസം തരുന്ന കാര്യമാണെന്ന് രാധയുടെ ഭർത്താവ് അച്ചപ്പൻ പ്രതികരിച്ചു. വീട്ടിലെ സാമ്പത്തികപ്രയാസങ്ങളും വന്യമൃഗശല്യം നാട്ടിലുണ്ടാക്കുന്ന പ്രയാസങ്ങളും എം.പി.യുടെ ശ്രദ്ധയിൽപ്പെടുത്തിയിരുന്നു. വീടിൻ്റെ ബാക്കിയുള്ള പണി നേരിട്ടു ചെയ്തുതരാമെന്നാണ് പറഞ്ഞതെന്നും അച്ചപ്പൻ വ്യക്തമാക്കി.

എ.ഐ.സി.സി. ജനറൽ സെക്രട്ടറി കെ.സി. വേണുഗോപാൽ എം.പി., കെ.പി.സി.സി. അധ്യക്ഷൻ കെ. സുധാകരൻ എം.പി., വർക്കിങ് പ്രസിഡന്റ് ടി. സിദ്ദിഖ് എം.എൽ.എ., വൈസ് പ്രസിഡന്റ്റ് സണ്ണി ജോസഫ് എം.എൽ.എ. ജനറൽ സെക്രട്ടറി ജമീല ആലിപ്പറ്റ, ഡി.സി.സി. അധ്യക്ഷൻ എൻ.ഡി. അപ്പച്ചൻ, മാനന്തവാടി ബ്ലോക്ക് കോൺഗ്രസ് കമ്മിറ്റി പ്രസിഡൻ്റ് എ.എം. നിഷാന്ത്, കോൺഗ്രസ് മാനന്തവാടി മണ്ഡലം പ്രസിഡൻ്റ് സുനിൽ ആലിക്കൽ, മുജീബ് കോടിയാടൻ, സി.എച്ച്. സുഹൈർ തുടങ്ങിയവരും പ്രിയങ്ക ഗാന്ധിക്കൊപ്പമുണ്ടായിരുന്നു.