മാലിന്യമുക്ത നവകേരളം പദ്ധതി; ഇരിട്ടി നഗരസഭയ്ക്ക് അംഗീകാരം

ശുചിത്വമാലിന്യ സംസ്കരണ പ്രവർത്തനങ്ങളിലെ മികവിന് ഇരിട്ടി നഗരസഭയ്ക്കുള്ള പുരസ്കാരം നവകേരളം കർമപദ്ധതി സംസ്ഥാന കോഡിനേറ്റർ ഡോ. ടി.എൻ. സീമയിൽനിന്ന്‌ നഗരസഭാധ്യക്ഷ കെ. ശ്രീലത ഏറ്റുവാങ്ങുന്നു

ഇരിട്ടി : മാലിന്യമുക്ത നവകേരളം കർമപദ്ധതിയുടെ ഭാഗമായി ഇരിട്ടി നഗരസഭ നടത്തിയ പ്രവർത്തനങ്ങൾക്ക് അംഗീകാരം. മാലിന്യനീക്കത്തിനും സംസ്കരണത്തിനും നടത്തിയ പ്രവർത്തനങ്ങളെ വിലയിരുത്തിയാണ് അംഗീകാരം. നവകേരളം കർമപദ്ധതി സംസ്ഥാന കോഡിനേറ്റർ ഡോ. ടി.എൻ. സീമ പുരസ്കാരം സമ്മാനിച്ചു. നഗരസഭാധ്യക്ഷ കെ. ശ്രീലത പുരസ്കാരം ഏറ്റുവാങ്ങി.

ജില്ലാ പഞ്ചായത്ത് പ്രസിഡൻറ് കെ.കെ. രത്നകുമാരി അധ്യക്ഷയായി. നഗരസഭാ സെക്രട്ടറി രാഗേഷ് പാലേരിവീട്ടിൽ, മാലിന്യമുക്ത നവകേരളം സംഘാടകസമിതി പ്രവർത്തകർ, ശുചിത്വമിഷൻ, ഹരിതകേരള മിഷൻ ജില്ലാ കോഡിനേറ്റർമാർ തുടങ്ങിയവർ പങ്കെടുത്തു. ജൈവമാലിന്യം ഉറവിടത്തിൽതന്നെ സംസ്കരിക്കാൻ വീടുകളിലും സ്ഥാപനങ്ങളിലും റിങ് കമ്പോസ്റ്റ്, ബയോബിൻ, ബയോഗ്യാസ് തുടങ്ങിയ ഉറവിട മാലിന്യസംസ്കരണ സംവിധാനം ഉറപ്പാക്കിയിരുന്നു.