‘എഴുതിത്തീർത്ത സമ്പാദ്യം’ ഹരിതകർമസേനയ്ക്ക് കൈമാറി

തവനൂർ : അന്ത്യാളംകുടത്തുള്ള തൃക്കണാപുരം എസ്.എസ്.യു.പി. സ്കൂളിലെ കുട്ടികളുടെ ‘എഴുതിത്തീർത്ത സമ്പാദ്യം’ ഹരിതകർമസേനയ്ക്ക് കൈമാറി. ഉപയോഗിച്ചുകഴിഞ്ഞ പേനകൾ സ്വരൂപിക്കുന്നതിനായി സ്കൂളിലെ ഹരിതക്ലബ്ബിന്റെ നേതൃത്വത്തിലാണ് ‘എഴുതിത്തീർത്ത സമ്പാദ്യം’എന്ന പദ്ധതി തുടങ്ങിയത്.

ഉപയോഗിച്ചുതീർന്ന പേനകൾ ശേഖരിക്കുന്നതിനായി ക്ലാസ്‌മുറികളിൽ പ്രത്യേകം പെട്ടികൾ സ്ഥാപിച്ചിട്ടുണ്ട്. ഇതിൽ നിക്ഷേപിക്കുന്ന പേനകൾ മാസത്തിലൊരിക്കൽ ഹരിതകർമസേനയ്ക്ക് കൈമാറും. പ്ലാസ്റ്റിക് മാലിന്യങ്ങൾ വലിച്ചെറിയുന്ന രീതി കുട്ടികളിൽ ഉണ്ടാകാതിരിക്കാനാണ് ഹരിതസഭ പ്രോജക്ടിന്റെ ഭാഗമായി ഹരിതക്ലബ്ബ്‌ ഇത്തരത്തിലൊരു പദ്ധതിക്ക്‌ രൂപംനൽകിയത്.

ശേഖരിച്ച പേനകൾ ഹരിതകർമസേനാ അംഗങ്ങളായ വിജയലക്ഷ്മി, ധന്യ എന്നിവർക്ക് പ്രഥമാധ്യാപകൻ എസ്. ദിനേശ് കൈമാറി.