ഹോസ്റ്റലിലെ താമസക്കാരായി എലിയും പാമ്പും; തകർന്നു വീഴാറായ കെട്ടിടത്തിൽ കോഴിക്കോട് മെഡി. കോളേജ് വിദ്യാർഥികൾ

കോഴിക്കോട്: കോഴിക്കോട് മെഡിക്കൽ കോളജിൽ പി.ജി. വിദ്യാർഥികളുടെ ഹോസ്റ്റൽ ജീവിതം അതിരൂക്ഷമായ ദുരിതത്തിൽ. ഇരുന്നൂറിലധികം വിദ്യാർഥികൾ താമസിക്കുന്ന വർഷങ്ങൾ പഴക്കമുള്ള ഹോസ്റ്റൽ കെട്ടിടമാണ് എപ്പോൾ വേണമെങ്കിലും തകർന്നു വീഴാവുന്ന ശോചനീയാവസ്ഥയിലുള്ളത്. പഴകിയ കെട്ടിടത്തിനുള്ളിൽ പാമ്പിന്റെയും എലിയുടെയും ശല്യം രൂക്ഷമായത് വിദ്യാർഥികളുടെ ജീവന് തന്നെ ഭീഷണിയാകുന്നു.

​അടിസ്ഥാന സൗകര്യങ്ങൾ പോലുമില്ലാതെ കടുത്ത പ്രതിസന്ധിയാണ് വിദ്യാർഥികൾ നേരിടുന്നത്. കെട്ടിടത്തിലെ സ്ഥലപരിമിതി കാരണം ഒരു ചെറിയ മുറിയിൽത്തന്നെ നിരവധി പേരാണ് തിങ്ങിനിറഞ്ഞു കഴിയുന്നത്. പഠിക്കാൻ പോലും കഴിയാത്ത തരത്തിൽ സൗകര്യങ്ങൾ കുറഞ്ഞതോടെ, വലിയ തുക വാടക നൽകി പുറത്തു മുറികളെടുത്ത് താമസിക്കേണ്ട ഗതികേടിലാണ് ഭൂരിഭാഗം വിദ്യാർഥികളും.

​അതേസമയം, എട്ടു മാസം മുൻപ് ഉദ്ഘാടനം കഴിച്ച പുതിയ ഹോസ്റ്റൽ കെട്ടിടം ഇതുവരെയും വിദ്യാർഥികൾക്കായി തുറന്നുകൊടുത്തിട്ടില്ല. ഫർണിച്ചറുകൾ വാങ്ങാത്തതിനാലാണ് പുതിയ ഹോസ്റ്റൽ പ്രവർത്തനം ആരംഭിക്കാത്തതെന്നാണ് അധികൃതരുടെ വിചിത്രമായ വിശദീകരണം. പുതിയ കെട്ടിടം സജ്ജമായിട്ടും അത് അടച്ചിട്ടിരിക്കുന്നതിൽ വിദ്യാർഥികൾക്കിടയിൽ കടുത്ത അമർഷവും പ്രതിഷേധവും ഉയരുന്നുണ്ട്.

​വിദ്യാർഥികളുടെ സുരക്ഷയെ ബാധിക്കുന്ന ഈ വിഷയത്തിൽ അധികൃതരും സർക്കാരും അടിയന്തരമായി ഇടപെട്ട് പുതിയ ഹോസ്റ്റൽ തുറന്നു നൽകിയില്ലെങ്കിൽ ശക്തമായ സമരപരിപാടികളിലേക്ക് നീങ്ങാനാണ് വിദ്യാർഥികളുടെ തീരുമാനം.