കൊയിലാണ്ടിയിൽ മോഷണപരമ്പര: പൂട്ടിയിട്ട വീട്ടിൽനിന്ന് 12 പവൻ കവർന്നു; റെയിൽവേ സ്റ്റേഷനിലും മോഷണം

കോഴിക്കോട്: കൊയിലാണ്ടിയിലും സമീപ പ്രദേശങ്ങളിലും വ്യാഴാഴ്ച രാത്രി മോഷണപരമ്പര. പൊയിൽക്കാവിലെ വീട്ടുപറമ്പിൽനിന്ന് പന്ത്രണ്ട് പവൻ സ്വർണാഭരണങ്ങളും ചേമഞ്ചേരി റെയിൽവേ സ്റ്റേഷനിൽനിന്ന് ടിക്കറ്റ് കൗണ്ടറിലെ പണവും മൊബൈൽ ഫോണും കവർന്നു. ഒരേ രാത്രിയിലാണ് വിവിധയിടങ്ങളിൽ മോഷണവും മോഷണശ്രമവും അരങ്ങേറിയത്.

​പൊയിൽക്കാവ് സ്വദേശി കരുണാകരന്റെ വീടിന്റെ ഗ്രില്ല് കുത്തിത്തുറന്നാണ് മോഷ്‌ടാവ് അകത്തുകടന്നത്. അലമാരയിൽ സൂക്ഷിച്ചിരുന്ന 12 പവൻ സ്വർണാഭരണങ്ങൾ കവരുകയായിരുന്നു. സമാനമായ രീതിയിൽ പൂക്കാട് പനായിലും വീട് കുത്തിത്തുറന്ന് മോഷണശ്രമം നടന്നു. എന്നാൽ, ശബ്ദം കേട്ട് വീട്ടുകാർ ഉണർന്നതോടെ മോഷ്‌ടാവ് രക്ഷപ്പെടുകയായിരുന്നു.

​ചേമഞ്ചേരി റെയിൽവേ സ്റ്റേഷനിൽ ജീവനക്കാരൻ ടിക്കറ്റ് കൗണ്ടറിന്റെ കതക് പൂട്ടി വീട്ടിൽ പോയ സമയത്താണ് മോഷണം നടന്നത്. കൗണ്ടറിൽ സൂക്ഷിച്ചിരുന്ന പണവും റെയിൽവേയുടെ ഔദ്യോഗിക ആവശ്യത്തിന് ഉപയോഗിച്ചിരുന്ന മൊബൈൽ ഫോണുമാണ് കവർന്നത്. സംഭവങ്ങൾക്കെല്ലാം പിന്നിൽ ഒരേ സംഘം തന്നെയാണെന്നാണ് പോലീസിന്റെ പ്രാഥമിക നിഗമനം. ഫോറൻസിക് സംഘവും വിരലടയാള വിദഗ്ദ്ധരും സ്ഥലത്തെത്തി തെളിവുകൾ ശേഖരിച്ചു. റെയിൽവേ സ്റ്റേഷൻ പരിസരത്തെയും പ്രദേശത്തെയും സി.സി.ടി.വി. ദൃശ്യങ്ങൾ പരിശോധിച്ച് പ്രതികളെ ഉടൻ പിടികൂടുമെന്ന് പോലീസ് വ്യക്തമാക്കി.