എൻ.ഐ.ടി.യിൽ വിദ്യാർഥിപ്രതിഷേധം ശക്തമാകുന്നു; ചർച്ച മാറ്റിവെച്ചതിൽ പ്രതിഷേധിച്ച് സമരം കടുപ്പിക്കാൻ തീരുമാനം

മുക്കം: വിവിധ ആവശ്യങ്ങൾ ഉന്നയിച്ച് കോഴിക്കോട് നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി (എൻ.ഐ.ടി.) കാമ്പസിൽ വിദ്യാർഥികൾ നടത്തിവരുന്ന സമരം കൂടുതൽ ശക്തമാകുന്നു. ഹോസ്റ്റലുകളിൽ അടിസ്ഥാന സൗകര്യങ്ങൾ വർധിപ്പിക്കുക, മുൻപുണ്ടായിരുന്ന സ്റ്റുഡന്റ്സ് അഫയേഴ്‌സ് കൗൺസിൽ പുനഃസ്ഥാപിക്കുക, അടച്ചിട്ട സി ഗേറ്റ് തുറക്കുക തുടങ്ങിയ ആവശ്യങ്ങൾ ഉന്നയിച്ചാണ് വിദ്യാർഥികൾ പ്രതിഷേധിക്കുന്നത്. അഞ്ഞൂറിലധികം വിദ്യാർഥികളാണ് കഴിഞ്ഞ മൂന്നു ദിവസമായി കാമ്പസിനകത്ത് സമരമുഖത്തുള്ളത്.

​ആവശ്യങ്ങൾ ഉന്നയിച്ച് കഴിഞ്ഞ ഒന്നിന് വിദ്യാർഥികൾ ഡയറക്ടർക്ക് തുറന്ന കത്തെഴുതുകയും കാമ്പസിൽ പ്രതിഷേധിക്കുകയും ചെയ്തിരുന്നു. കഴിഞ്ഞ ബുധനാഴ്ച ചർച്ച നടത്തി മടങ്ങുകയായിരുന്ന വിദ്യാർഥികൾ മെഗാ ഹോസ്റ്റൽ പരിസരത്ത് ഡയറക്ടറുടെ കാർ തടയുകയുണ്ടായി. തുടർന്ന്, വിദ്യാർഥികൾക്ക് കാര്യങ്ങൾ അവതരിപ്പിക്കാൻ ശനിയാഴ്ച വിശദമായ ചർച്ച നടത്താമെന്നും ആവശ്യങ്ങൾ ഈ ചർച്ചയിൽ സമർപ്പിക്കണമെന്നും ഡയറക്ടർ നിർദേശിച്ചതിനെത്തുടർന്നാണ് അന്ന് സമരം താൽക്കാലികമായി അവസാനിപ്പിച്ചത്.

​എന്നാൽ, നിശ്ചയിച്ചിരുന്ന ചർച്ച മാറ്റിവെച്ചതായി ശനിയാഴ്ച വൈകീട്ടോടെ ഡയറക്ടർ അറിയിച്ചതിനെത്തുടർന്നാണ് വിദ്യാർഥികൾ വീണ്ടും സമരം ശക്തമാക്കാൻ തീരുമാനിച്ചത്. എൻ.ഐ.ടി. പ്രധാന കാമ്പസിൽ ഒരു കോടി രൂപ ചെലവഴിച്ച് വിവേകാനന്ദ പ്രതിമ സ്ഥാപിക്കുന്ന പദ്ധതി മാറ്റിവെച്ച്, വിദ്യാർഥികളുടെ അടിസ്ഥാന പ്രശ്നങ്ങൾ പരിഹരിക്കാൻ അടിയന്തര നടപടി സ്വീകരിക്കണമെന്നാണ് പ്രധാന ആവശ്യം.