മീനങ്ങാടി സ്കൂൾ വിനോദയാത്ര വിവാദം: വിദ്യാർഥികൾക്കെതിരായ സൈബർ ആക്രമണത്തിൽ പോക്‌സോ കേസ്

​വയനാട്: മീനങ്ങാടി ഹയർ സെക്കൻഡറി സ്കൂളിലെ വിനോദയാത്രയുമായി ബന്ധപ്പെട്ട വിവാദത്തിൽ വിദ്യാർഥികളെ സാമൂഹിക മാധ്യമങ്ങളിലൂടെ അധിക്ഷേപിച്ച സംഭവത്തിൽ സൈബർ പോലീസ് പോക്‌സോ കേസെടുത്തു. യു.ഡി.എഫ് മീനങ്ങാടി നേതൃത്വം നൽകിയ പരാതിയുടെ അടിസ്ഥാനത്തിലാണ് പോലീസ് നടപടി.

​18 വയസ്സിൽ താഴെയുള്ള കുട്ടികളെ സോഷ്യൽ മീഡിയ വഴി അപകീർത്തിപ്പെടുത്തിയതിന് ഐ.ടി. ആക്ടിലെ 67B, പോക്‌സോ ആക്ടിലെ 11(i), 12 എന്നീ വകുപ്പുകളും ബി.എൻ.എസ്. 79-ാം വകുപ്പും പ്രകാരമാണ് കേസ് രജിസ്റ്റർ ചെയ്തിരിക്കുന്നത്. കുറ്റകരമായ രീതിയിൽ പോസ്റ്റുകൾ ഇട്ടവരും മോശം കമന്റുകൾ രേഖപ്പെടുത്തിയവരും കേസുകളിൽ പ്രതികളാകും. ഇതിനായി അധിക്ഷേപ പരാമർശം നടത്തിയ ഫേസ്ബുക്ക് അക്കൗണ്ടുകൾ സൈബർ പോലീസിന്റെ ശക്തമായ നിരീക്ഷണത്തിലാണ്.

​വിനോദയാത്രയ്ക്കിടെ പ്രിൻസിപ്പലും പി.ടി.എ. പ്രസിഡന്റും ഹൈദരാബാദിലെ ബാർ റെസ്റ്റോറന്റിൽ കയറിപ്പോകുന്നതിന്റെയും ഇറങ്ങിവരുന്നതിന്റെയും ദൃശ്യങ്ങൾ യു.ഡി.എഫ് നേതൃത്വമാണ് പുറത്തുവിട്ടത്. വിനോദയാത്രയ്ക്കിടെയുണ്ടായ സംഭവങ്ങളെക്കുറിച്ച് കുട്ടികൾ ഉന്നയിച്ച ആരോപണങ്ങൾ ശരിയാണെന്ന് തെളിയിക്കാനാണ് ദൃശ്യങ്ങൾ നൽകിയതെന്നാണ് ഇവരുടെ വിശദീകരണം. ഈ ദൃശ്യങ്ങൾ പ്രചരിച്ചതിന് പിന്നാലെയാണ് സോഷ്യൽ മീഡിയയിൽ വിദ്യാർഥികൾക്കെതിരെ വ്യാപക സൈബർ ആക്രമണം ഉണ്ടായത്.