നിർമാണം നിലച്ചിട്ട് മാസങ്ങൾ: വെസ്റ്റ് മാമ്പറ്റ സ്റ്റേഡിയം എം.എൽ.എ. സന്ദർശിച്ചു; അടുത്താഴ്ച യോഗം വിളിക്കും

​മുക്കം: നിർമാണം പാതിവഴിയിൽ നിലച്ച മുക്കം നഗരസഭയിലെ വെസ്റ്റ് മാമ്പറ്റ അന്താരാഷ്ട്ര സ്റ്റേഡിയം സി.കെ. കാസിം എം.എൽ.എ. സന്ദർശിച്ചു. ആറുമാസത്തിനകം പൂർത്തിയാക്കുമെന്ന് പ്രഖ്യാപിച്ച് നാലുവർഷമായിട്ടും പണി പൂർത്തിയാകാത്തതിൽ പ്രദേശവാസികളും കായികപ്രേമികളും എം.എൽ.എ.യെ നേരിട്ട് പ്രതിഷേധവും ആശങ്കയും അറിയിച്ചു. തുടർന്ന്, പദ്ധതിയുടെ നിർവഹണ ഏജൻസിയായ കിറ്റ്കോ, കരാറുകാരായ ഊരാളുങ്കൽ ലേബർ കോൺട്രാക്ട് സൊസൈറ്റി എന്നിവരുടെ പ്രതിനിധികളെയും ജനപ്രതിനിധികളെയും ഉൾപ്പെടുത്തി പ്രശ്‌നപരിഹാരത്തിനായി അടുത്താഴ്ച യോഗം ചേർന്ന് തീരുമാനമെടുക്കുമെന്ന് എം.എൽ.എ. ഉറപ്പുനൽകി.

​കിഴക്കൻ മലയോര മേഖലയുടെ കായിക വികസനം ലക്ഷ്യമിട്ട് കിഫ്ബി ധനസഹായത്തോടെ ആറരക്കോടിയോളം രൂപ ചെലവിലാണ് സംസ്ഥാന സ്പോർട്സ് ഡയറക്ടറേറ്റിന് കീഴിൽ സ്റ്റേഡിയം നിർമാണം ആരംഭിച്ചത്. രണ്ടേക്കർ മൈതാനത്ത് ടർഫ് ഫുട്‌ബോൾ കോർട്ട്, 200 മീറ്റർ സിന്തറ്റിക് ട്രാക്ക്, വോളിബോൾ കോർട്ട്, ഗാലറി, ഡ്രസ്സിങ് റൂം, ജിംനേഷ്യം, ജംപിങ് പിറ്റുകൾ എന്നിവയാണ് പദ്ധതിയിലുള്ളത്. എന്നാൽ നിർമാണം നിലച്ചതോടെ പ്രദേശം കാടുകയറുകയും കെട്ടിടത്തിൽ സമൂഹവിരുദ്ധ ശല്യം രൂക്ഷമാകുകയും ചെയ്തിട്ടുണ്ട്. ജനപ്രതിനിധികളും രാഷ്ട്രീയ പാർട്ടി നേതാക്കളും എം.എൽ.എ.യ്ക്കൊപ്പമുണ്ടായിരുന്നു.