മാപ്പപേക്ഷ നൽകിയാൽ പരീക്ഷ എഴുതാൻ ഇനിയും സാധ്യത: മന്ത്രി

കോഴിക്കോട്: കാലടി സർവകലാശാലയിലെ വിദ്യാർഥികൾ മാപ്പപേക്ഷ നൽകി തെറ്റ് ഉൾക്കൊണ്ടാൽ അവർക്ക് പരീക്ഷ എഴുതാൻ ഇനിയും അവസരമുണ്ടെന്ന് ഉന്നതവിദ്യാഭ്യാസ മന്ത്രി റോജി എം. ജോൺ പറഞ്ഞു. കോഴിക്കോട്ട് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

​വിദ്യാർഥികൾക്ക് പരീക്ഷ എഴുതാൻ കഴിയാത്തതിൽ സന്തോഷിക്കുന്ന ആളല്ല താനെന്നും വിദ്യാർഥികൾ പരീക്ഷ എഴുതണമെന്നാണ് സർക്കാരിന്റെയും സർവകലാശാലയുടെയും നിലപാടെന്നും മന്ത്രി വ്യക്തമാക്കി. എന്നാൽ സർവകലാശാലയുടെ സുഗമമായ നടത്തിപ്പിന് തടസ്സം സൃഷ്ടിക്കുന്ന തരത്തിലുള്ള സമരങ്ങൾ അനുവദിക്കാനാകില്ലെന്നും അദ്ദേഹം കൂട്ടിച്ചേർത്തു.

​കാലടി തന്റെ സ്വന്തം മണ്ഡലത്തിലാണെന്നും അവിടെ നടക്കുന്ന കാര്യങ്ങളെക്കുറിച്ച് കൃത്യമായ ബോധ്യമുണ്ടെന്നും മന്ത്രി ചൂണ്ടിക്കാട്ടി. ക്യാമ്പസിൽ നടക്കുന്ന കാര്യങ്ങൾ ഇനിയും പുറത്തുവരാൻ പോകുന്നതേയുള്ളൂ. ഡിഗ്രി പാസാകാത്ത എസ്.എഫ്.ഐ. നേതാവിന് കഴിഞ്ഞ സിൻഡിക്കേറ്റ് ചേർന്ന് പി.ജി.ക്ക് പ്രവേശനം നൽകിയിരുന്നു. എത്രയൊക്കെ സമരങ്ങൾ നടന്നാലും അവിടെ നടന്നിട്ടുള്ള പലതരത്തിലുള്ള ക്രമക്കേടുകളും പുറത്തുകൊണ്ടുവരുമെന്ന് മന്ത്രി പറഞ്ഞു.

​സസ്പെൻഷൻ കാലയളവിലും ചില വിദ്യാർഥികൾ ക്യാമ്പസിൽ പ്രവേശിച്ച് മറ്റുള്ളവരെ ഭീഷണിപ്പെടുത്തിയിട്ടുണ്ടെന്ന് ചൂണ്ടിക്കാട്ടിയ മന്ത്രി, അക്രമത്തിലൂടെയും ഭീഷണിയിലൂടെയും അരാജകത്വത്തിലൂടെയുമാണോ സമരം നടത്തേണ്ടതെന്നും ചോദിച്ചു.