കുപ്പിക്കഴുത്തിൽ കുടുങ്ങി കുറ്റ്യാടി ടൗൺ; ഗതാഗതക്കുരുക്കിന് പരിഹാരം കാണാതെ അധികൃതർ

കുറ്റ്യാടി : അഞ്ച് പ്രധാന റോഡുകൾ സംഗമിക്കുന്ന കുറ്റ്യാടി ടൗൺ ജങ്ഷൻ കടുത്ത ഗതാഗതക്കുരുക്കിൽ അമരുന്നു. കുരുക്കിന് പ്രധാന കാരണമായ വയനാട് റോഡിന്റെ തുടക്കത്തിലെ 'കുപ്പിക്കഴുത്ത്' (ബോട്ടിൽ നെക്ക്) ഒഴിവാക്കണമെന്ന ആവശ്യം ശക്തമാകുമ്പോഴും അധികൃതരുടെ ഭാഗത്തുനിന്ന് നടപടികളൊന്നും ഉണ്ടാകുന്നില്ല. ടൗൺ ജങ്ഷനിൽനിന്ന് വയനാട് റോഡിലേക്ക് തിരിയുന്ന ഭാഗത്ത് റോഡിന് വീതി തീരെ കുറവായതിനാൽ വലിയ വാഹനങ്ങൾക്ക് ഇവിടെനിന്ന് എളുപ്പത്തിൽ തിരിഞ്ഞുപോകാൻ കഴിയാത്ത സ്ഥിതിയാണുള്ളത്.

​വയനാട് ഭാഗത്തുനിന്ന് വരുന്ന വാഹനങ്ങൾ പൂർണമായും ഒഴിഞ്ഞുപോയാൽ മാത്രമേ ബസുകൾക്കും ലോറികൾക്കും മുന്നോട്ട് കടന്നുപോകാൻ സാധിക്കൂ. കഴിഞ്ഞ ദിവസംപോലും ഇവിടെ കെ.എസ്.ആർ.ടി.സി. ബസ് കുടുങ്ങി ഗതാഗതം തടസ്സപ്പെട്ടിരുന്നു. വിവിധ സംഘടനകളും നാട്ടുകാരും ഇതുസംബന്ധിച്ച് പലതവണ അധികാരികൾക്ക് നിവേദനം നൽകിയെങ്കിലും ഫലമുണ്ടായില്ല.

പ്രശ്നപരിഹാരത്തിനായി പൊതുമരാമത്ത് വകുപ്പ് നേരത്തെ ശുപാർശകൾ തയ്യാറാക്കിയിരുന്നെങ്കിലും പിന്നീട് ആ നീക്കങ്ങളെല്ലാം നിലച്ച മട്ടാണ്. ടൗൺ കടന്നുപോകാൻ മാത്രം വാഹനങ്ങൾ ദിവസവും 20 മിനിറ്റിലേറെ കാത്തുനിൽക്കേണ്ടി വരുന്ന സാഹചര്യമാണ് നിലവിലുള്ളത്. ഈ ദുരിതം കാരണം ദീർഘദൂര ബസുകൾ പോലും ഇപ്പോൾ കുറ്റ്യാടി വഴി സർവീസ് നടത്താൻ മടിക്കുകയാണ്. വരാനിരിക്കുന്ന മലയോര ഹൈവേയുടെ പ്രവൃത്തി പൂർത്തിയാകുന്നതോടെ ഇതുവഴിയുള്ള വാഹനങ്ങളുടെ എണ്ണം ഇനിയും വർദ്ധിക്കുമെന്ന ആശങ്കയും നിലനിൽക്കുന്നുണ്ട്.

​ഓവുചാൽ നിർമാണമാണ് പ്രധാന പ്രതിസന്ധിക്ക് കാരണമെന്ന് നാട്ടുകാർ ചൂണ്ടിക്കാണിക്കുന്നു. വയനാട് റോഡിന്റെ തുടക്കത്തിൽ നിർമിച്ച ഓവുചാലും നടപ്പാതയും കാരണം റോഡിന്റെ യഥാർത്ഥ വീതി കുറയുകയായിരുന്നു.

ഓവുചാലിന്റെയും നടപ്പാതയുടെയും വീതി കുറയ്ക്കുക എന്നതാണ് നിലവിലുള്ള ഒരു താത്കാലിക പരിഹാരം. ഭാവിയിൽ രണ്ട് ബൈപ്പാസുകൾ വരുന്നുണ്ടെങ്കിലും ടൗണിലെ ഈ കുപ്പിക്കഴുത്ത് പരിഹരിക്കാതെ ഗതാഗതക്കുരുക്കിന് ശാശ്വത പരിഹാരമാകില്ല. അതിനാൽ ആവശ്യമായ സ്ഥലമേറ്റെടുപ്പ് ഉൾപ്പെടെയുള്ള നടപടികൾ സ്വീകരിച്ച് ദീർഘകാലാടിസ്ഥാനത്തിലുള്ള പദ്ധതികൾ നടപ്പാക്കണമെന്നാണ് നാട്ടുകാരുടെ ശക്തമായ ആവശ്യം.