പ്രായപൂർത്തിയാകാത്തവർ വാഹനമോടിച്ചതിന് റേഞ്ചിൽ 51 കേസുകൾ; കൂടുതൽ കോഴിക്കോട് റൂറലിൽ

കോഴിക്കോട്: പ്രായപൂർത്തിയാകാത്തവർ വാഹനമോടിക്കുന്നത് തടയുന്നതിനായി കണ്ണൂർ റേഞ്ചിലെ വിവിധ പോലീസ് ജില്ലകളിൽ ഒക്ടോബർ 27-ന് നടത്തിയ പ്രത്യേക പരിശോധനയിൽ 51 കേസുകൾ രജിസ്റ്റർ ചെയ്തു. കണ്ണൂർ റേഞ്ച് ഡി.ഐ.ജി. കെ. കാർത്തിക്കിന്റെ നിർദേശപ്രകാരം നടത്തിയ സ്പെഷ്യൽ ഡ്രൈവിൽ ഏറ്റവും കൂടുതൽ കേസുകൾ റിപ്പോർട്ട് ചെയ്തത് കോഴിക്കോട് റൂറലിലാണ് (14). കാസർഗോഡ് ജില്ലയിൽ 13-ഉം കണ്ണൂർ സിറ്റിയിൽ 12-ഉം കണ്ണൂർ റൂറലിൽ ആറും കോഴിക്കോട് സിറ്റിയിൽ അഞ്ചും വയനാട്ടിൽ ഒരു കേസുമാണ് കണ്ടെത്തിയത്.

​പ്രായപൂർത്തിയാകാത്തവർക്ക് വാഹനങ്ങൾ നൽകുന്ന ആർ.സി. ഉടമകൾക്കെതിരെയും ശക്തമായ നിയമനടപടി സ്വീകരിക്കുമെന്ന് പോലീസ് അറിയിച്ചു. വരും ദിവസങ്ങളിലും പരിശോധന ശക്തമായി തുടരും. ഇതിനിടെ, പയ്യോളിയിൽ പ്രായപൂർത്തിയാകാതെ ഇരുചക്രവാഹനം ഓടിച്ച 14-ഉം 16-ഉം വയസ്സുള്ള രണ്ട് വിദ്യാർത്ഥികളെ പോലീസ് കസ്റ്റഡിയിലെടുത്തു. ഇരിങ്ങൽ അറുവയലിൽനിന്ന് കോട്ടക്കൽ ഭാഗത്തേക്ക് സ്കൂട്ടർ ഓടിച്ച പതിനാലുകാരിയും, അട്ടക്കുണ്ടിൽനിന്ന് മണിയൂർ ഭാഗത്തേക്ക് ഹെൽമെറ്റില്ലാതെയും രണ്ട് യാത്രക്കാരെ പിൻസീറ്റിലിരുത്തിയും അശ്രദ്ധമായി സ്കൂട്ടറോടിച്ച പതിനാറുകാരനുമാണ് പിടിയിലായത്.

​രണ്ട് വാഹനങ്ങളും പോലീസ് കസ്റ്റഡിയിലെടുക്കുകയും മാതാപിതാക്കളുടെ അറിവോടെയാണ് വാഹനം ഉപയോഗിച്ചതെന്ന കുട്ടികളുടെ മൊഴിയുടെ അടിസ്ഥാനത്തിൽ വാഹന ഉടമകളായ മാതാക്കൾക്കെതിരെ കേസെടുക്കുകയും ചെയ്തു. ഭാരതീയ ന്യായ സംഹിതയിലെയും മോട്ടോർ വാഹന നിയമത്തിലെയും വിവിധ വകുപ്പുകൾ പ്രകാരമാണ് നടപടി.