മഴ; കുറ്റ്യാടി-തൊട്ടിൽപ്പാലം സംസ്ഥാനപാതയിൽ രൂക്ഷമായ വെള്ളക്കെട്ട്

കുറ്റ്യാടി: മലയോര മേഖലയിൽ വ്യാഴാഴ്ച പെയ്ത ശക്തമായ മഴയിൽ കുറ്റ്യാടി-തൊട്ടിൽപ്പാലം സംസ്ഥാനപാതയിൽ വെള്ളക്കെട്ട് രൂപപ്പെട്ടു. ഉച്ചയ്ക്ക് 12 മണിയോടെ ആരംഭിച്ച മഴ വൈകുന്നേരം വരെ നീണ്ടുനിന്നതോടെ പൈക്കളങ്ങാടി ഇഖ്റ ആശുപത്രിക്ക് സമീപത്തും കുറ്റ്യാടി ടൗണിന് സമീപവുമാണ് വെള്ളം കെട്ടിനിന്നത്. ഇത് വാഹനയാത്രക്കാരെയും കാൽനടയാത്രക്കാരെയും ഒരുപോലെ ദുരിതത്തിലാക്കി.

​ആശുപത്രിക്ക് സമീപത്തെ ഓവുചാൽ അടുത്തിടെ കോൺക്രീറ്റ് ചെയ്ത് പുതുക്കിപ്പണിതിരുന്നെങ്കിലും മഴവെള്ളം സുഗമമായി ഒഴുകിപ്പോകാത്തതാണ് വെള്ളക്കെട്ടിന് പ്രധാന കാരണം. റോഡിലൂടെ നടന്നുപോകുന്നവർക്ക് ഓവുചാൽ തിരിച്ചറിയാൻ കഴിയാത്തതിനാൽ അപകടസാധ്യതയും വർധിച്ചിട്ടുണ്ട്. ഇതിന്റെ ഭാഗമായി, കഴിഞ്ഞദിവസം ആശുപത്രിയിൽ ചികിത്സയ്ക്കായി എത്തിയ ഒരു വീട്ടമ്മ ഓവുചാലിൽ വീണ് പരിക്കേറ്റിരുന്നു.

​ആശുപത്രിയിലേക്കും മറ്റ് ആവശ്യങ്ങൾക്കായി സമീപപ്രദേശങ്ങളിലേക്കും എത്തുന്നവരുൾപ്പെടെ നിരവധി പേർ ആശ്രയിക്കുന്ന പ്രധാന പാതയാണിത്. മഴ ശക്തമാകുമ്പോൾ സ്ഥിതി കൂടുതൽ അപകടകരമാകുമെന്ന ആശങ്കയും നാട്ടുകാർ പങ്കുവെക്കുന്നുണ്ട്. ഓവുചാലിലൂടെ മഴവെള്ളം തടസ്സമില്ലാതെ ഒഴുകിപ്പോകുന്നതിനുള്ള സംവിധാനം ഒരുക്കണമെന്നും വെള്ളക്കെട്ടിന് ശാശ്വത പരിഹാരം കാണണമെന്നും നാട്ടുകാരുടെ ശക്തമായ ആവശ്യം ഉയർന്നിട്ടുണ്ട്.