വൈക്കം സി.ഐ. ഷമീർ ഖാൻ കൈക്കൂലി കേസിൽ സസ്പെൻഷനിൽ

​കോട്ടയം: കൈക്കൂലി വാങ്ങിയ കേസിൽ വൈക്കം സി.ഐ. ഷമീർ ഖാനെ സർവീസിൽ നിന്ന് സസ്പെൻഡ് ചെയ്തു. അന്വേഷണ വിധേയമായാണ് ഈ നടപടി. സി.ഐ.യെ സസ്‌പെൻഡ് ചെയ്തുകൊണ്ടുള്ള ഐ.ജി.യുടെ ഉത്തരവ് ജില്ലാ പൊലീസ് മേധാവി വൈക്കം ഡിവൈഎസ്പിക്ക് കൈമാറി. കൈക്കൂലി ആരോപണത്തെ തുടർന്ന് കഴിഞ്ഞ ദിവസമാണ് സി.ഐ.ക്കെതിരെ വിജിലൻസ് കേസ് രജിസ്റ്റർ ചെയ്തത്.

​വിജിലൻസ് നടത്തിയ മിന്നൽ പരിശോധനയിലാണ് ഗൂഗിൾ പേ വഴി 2,28,000 രൂപ കൈക്കൂലിയായി വാങ്ങിയതായി കണ്ടെത്തിയത്. അസം സ്വദേശിയായ ജോഗട്ട് ഗൊഗോയ് എന്നയാളുടെ അക്കൗണ്ടിൽ നിന്നാണ് ഇത്രയും തുക കൈക്കൂലിയായി വാങ്ങിയതായി കണ്ടെത്തിയിട്ടുള്ളത്. തുടർന്ന് നടത്തിയ പരിശോധനയിൽ സി.ഐ.യുടെ പക്കൽ നിന്നും മൊബൈൽ ഫോണും എടിഎം കാർഡും പിടിച്ചെടുത്തിരുന്നു.

​സ്റ്റേഷൻ പരിധിയിലുള്ള ടിപ്പർ, ടോറസ് ലോറിക്കാരിൽ നിന്നും, മണ്ണ് മാഫിയകളിൽ നിന്നും, സ്റ്റേഷനിൽ രജിസ്റ്റർ ചെയ്യുന്ന വിവിധ കേസുകളിലെ പ്രതികളിൽ നിന്നും വ്യാപകമായി കൈക്കൂലി വാങ്ങുന്നുവെന്ന രഹസ്യവിവരത്തിന്റെ അടിസ്ഥാനത്തിലായിരുന്നു വിജിലൻസ് പരിശോധന നടത്തിയത്. നേരിട്ടും യു.പി.ഐ. ഇടപാടുകൾ വഴിയുമാണ് ഇയാൾ പണം വാങ്ങിയിരുന്നതെന്നാണ് വിജിലൻസിന് ലഭിച്ച പരാതി.