ആയുർവേദ ആശുപത്രികളിൽ ഫർണിച്ചർ വാങ്ങിയതിൽ ക്രമക്കേട്: വിജിലൻസ് അന്വേഷണത്തിന് ഉത്തരവിട്ട് മന്ത്രി

തിരുവനന്തപുരം: സംസ്ഥാനത്തെ വിവിധ ആയുർവേദ ആശുപത്രികളിലേക്ക് ഫർണിച്ചറുകൾ വാങ്ങിയതിൽ വ്യാപക ക്രമക്കേട് നടന്ന സംഭവത്തിൽ വിജിലൻസ് അന്വേഷണത്തിന് ഉത്തരവിട്ട് ആരോഗ്യമന്ത്രി കെ. മുരളീധരൻ. നാഷണൽ ആയുഷ് മിഷൻ മുൻ സ്റ്റേറ്റ് പ്രോഗ്രാം മാനേജർ പി.ആർ. സജിക്കെതിരെയാണ് അന്വേഷണത്തിന് നിർദേശം നൽകിയത്. വിഷയത്തിൽ ധനകാര്യ വകുപ്പിന്റെ അന്വേഷണം മതിയെന്ന പ്രിൻസിപ്പൽ സെക്രട്ടറിയുടെ ശുപാർശ പൂർണ്ണമായും തള്ളിക്കൊണ്ടാണ് മന്ത്രി വിജിലൻസ് അന്വേഷണത്തിന് ഉത്തരവിട്ടത്.

ഇതുസംബന്ധിച്ച ഫയൽ തുടർനടപടികൾക്കായി ആഭ്യന്തര വകുപ്പിന് കൈമാറി.

​കണ്ണൂർ പിണറായിയിലെ ഗവ. ആയുർവേദ ആശുപത്രി കെട്ടിടത്തിന്റെ നിർമാണം പൂർത്തിയാകുന്നതിന് മുൻപ് തന്നെ ഇവിടേക്കെന്ന പേരിൽ 11.45 ലക്ഷം രൂപയുടെ ഫർണിച്ചറുകൾ വാങ്ങിയതാണ് പ്രധാന ക്രമക്കേട്. നാഷണൽ ആയുഷ് മിഷൻ മുൻ സ്റ്റേറ്റ് പ്രോഗ്രാം മാനേജർക്ക് ഇത്രയും വലിയ തുകയ്ക്കുള്ള പർച്ചേസ് ഓർഡർ നൽകാനുള്ള അധികാരമില്ലെന്ന് പ്രാഥമിക അന്വേഷണത്തിൽ തന്നെ കണ്ടെത്തിയിരുന്നു.

​ആർട്‌കോ (ARTCO) മുഖേനയാണ് ഈ ഫർണിച്ചറുകൾ വാങ്ങിയിരുന്നത്. ഇതിനുപുറമെ മട്ടന്നൂർ, ചാലക്കുടി, വെങ്ങാനൂർ എന്നിവിടങ്ങളിലേക്കും സമാനമായി ചട്ടവിരുദ്ധമായി സാധനങ്ങൾ വാങ്ങിയതായി കണ്ടെത്തിയിട്ടുണ്ട്. ഇത്തരം ഗുരുതരമായ ക്രമക്കേടുകൾ വ്യക്തമായ സാഹചര്യത്തിലാണ് വെറുമൊരു ധനകാര്യ വകുപ്പ് തല അന്വേഷണം കൊണ്ട് കാര്യമില്ലെന്ന ഉറച്ച നിലപാടിലേക്ക് മന്ത്രി എത്തിയത്.