റോഡിൽ ചോരപ്പുഴ; അടിയന്തര നടപടി വേണമെന്ന് പാറക്കൽ അബ്ദുള്ള എം.എൽ.എ.

കുറ്റ്യാടി: സംസ്ഥാനത്ത് ഒന്നര വർഷത്തിനിടെ റോഡപകടങ്ങളിൽ അയ്യായിരത്തിലധികം പേർ മരിച്ചതായി പാറക്കൽ അബ്ദുള്ള എം.എൽ.എ. നിയമസഭയിൽ വ്യക്തമാക്കി. റോഡപകടങ്ങൾ ക്രമാതീതമായി വർധിക്കുന്ന സാഹചര്യത്തിൽ സർക്കാർ അടിയന്തരനടപടി സ്വീകരിക്കണമെന്ന് ആവശ്യപ്പെട്ട് സബ്മിഷൻ ഉന്നയിക്കുകയായിരുന്നു അദ്ദേഹം. ഒന്നര വർഷത്തിനിടെ ഒരു ലക്ഷത്തിലധികം പേർക്ക് പരിക്കേൽക്കുകയും അയ്യായിരത്തിലേറെ പേർക്ക് ജീവൻ നഷ്ടമാവുകയും ചെയ്തിട്ടുണ്ട്. അപകടത്തിൽപ്പെടുന്നവരിൽ 60 ശതമാനവും 18-നും 45-നും ഇടയിൽ പ്രായമുള്ള ചെറുപ്പക്കാരാണ് എന്നത് ഞെട്ടിക്കുന്ന വസ്തുതയാണെന്ന് അദ്ദേഹം ചൂണ്ടിക്കാട്ടി.

​അതിവേഗം, അശ്രദ്ധമായ ഡ്രൈവിങ്, ലഹരി ഉപയോഗിച്ചുള്ള വാഹനമോടിക്കൽ, ട്രാഫിക് നിയമങ്ങളെക്കുറിച്ചുള്ള അജ്ഞത എന്നിവയാണ് പ്രധാന അപകട കാരണങ്ങളായി ചൂണ്ടിക്കാണിക്കപ്പെടുന്നത്. അപകടകരമായ ഡ്രൈവിങ്ങിനെതിരേ കർശന നിയമങ്ങൾ കൊണ്ടുവരണമെന്നും, മനപ്പൂർവമല്ലാത്ത നരഹത്യ എന്ന വകുപ്പ് പൊളിച്ചെഴുതി ഹൈക്കോടതിയുടെ നിർദേശങ്ങൾ സർക്കാർ പരിഗണിക്കണമെന്നും എം.എൽ.എ. ആവശ്യപ്പെട്ടു.

​സബ്മിഷന് മറുപടിയായി വകുപ്പ് മന്ത്രി സി.പി. ജോൺ സർക്കാരിന്റെ പുതിയ സുരക്ഷാ പദ്ധതികൾ വിശദീകരിച്ചു. മുഖ്യമന്ത്രി ചെയർമാനായുള്ള 'കേരള റോഡ് സേഫ്റ്റി മിഷൻ' സർക്കാർ അംഗീകരിച്ചിട്ടുണ്ടെന്ന് അദ്ദേഹം അറിയിച്ചു. സ്വീഡൻ മാതൃകയിൽ അപകട മരണനിരക്ക് ഗണ്യമായി കുറയ്ക്കുകയാണ് പദ്ധതിയിലൂടെ ലക്ഷ്യമിടുന്നത്. സീബ്രാ ലൈനുകളുടെ വീതി കൂട്ടുന്നതടക്കം കാൽനടക്കാർക്ക് മുൻഗണന നൽകുന്ന സുരക്ഷാ നടപടികൾ ഘട്ടംഘട്ടമായി നടപ്പാക്കുമെന്നും മന്ത്രി നിയമസഭയെ അറിയിച്ചു.