ജലജീവൻ പൈപ്പിടൽ: റൂട്ടിൽ മാറ്റം വരുത്താൻ യോഗത്തിൽ തീരുമാനം

പേരാമ്പ്ര: വാല്യക്കോട് - ചേനോളി - മുളിയങ്ങൽ കനാൽറോഡിന്റെ സംരക്ഷണം ഉറപ്പുവരുത്തി മാത്രമേ ജലജീവൻ കുടിവെള്ളപദ്ധതിയുടെ പൈപ്പ് ലൈൻ പ്രവൃത്തി നടത്താവൂ എന്ന് യോഗത്തിൽ തീരുമാനമായി. നൊച്ചാട് പഞ്ചായത്ത് ഓഫീസിൽ ചേർന്ന വിവിധ രാഷ്ട്രീയപ്പാർട്ടി പ്രതിനിധികൾ, ഇറിഗേഷൻ-ജല അതോറിറ്റി ഉദ്യോഗസ്ഥർ, കരാറുകാർ എന്നിവരുടെ യോഗത്തിലാണ് ഈ ധാരണയായത്. പ്രദേശവാസികളുടെ പ്രതിഷേധത്തെ തുടർന്ന് നിർത്തിവെച്ച നിർമാണ പ്രവൃത്തികൾക്ക് പരിഹാരം കാണുന്നതിന്റെ ഭാഗമായാണ് യോഗം ചേർന്നത്.

​പുതിയ തീരുമാനപ്രകാരം പൈപ്പ് ലൈൻ റോഡിന്റെ മധ്യഭാഗത്തുകൂടിയാണ് സ്ഥാപിക്കുക. ചേനോളി അച്ചൻകണ്ടി മീത്തൽ മുതൽ ചാലിൽ പാലം വരെ റോഡിന്റെ മധ്യഭാഗത്തുകൂടിയും, തുടർന്ന് കനാൽറോഡ് കുറുകെക്കടന്ന് മറുഭാഗത്തുകൂടി എ.കെ.ജി. സെന്റർ പ്രദേശം വരെയുമാണ് പൈപ്പിടുന്നത്. തീരുമാനത്തിന്റെ അടിസ്ഥാനത്തിൽ പൈപ്പ് സ്ഥാപിക്കേണ്ട സ്ഥലങ്ങൾ ഉദ്യോഗസ്ഥരടങ്ങുന്ന സംഘം നേരിട്ടെത്തി സന്ദർശിക്കുകയും പരിശോധന നടത്തുകയും ചെയ്തു.

​നേരത്തെ നാട്ടുകാരെയും ജനപ്രതിനിധികളെയും അറിയിക്കാതെ യോഗം വിളിച്ചുചേർക്കാതെ പ്രവൃത്തി നടത്തിയത് കഴിഞ്ഞദിവസം പ്രദേശവാസികൾ തടഞ്ഞിരുന്നു. തുടർന്നാണ് പ്രശ്നപരിഹാരത്തിനായി യോഗം വിളിച്ചത്. ഗ്രാമപ്പഞ്ചായത്ത് പ്രസിഡന്റ് ഷിജി കൊട്ടാറക്കൽ, സ്റ്റാൻഡിങ് കമ്മിറ്റി ചെയർമാന്മാർ, ഇറിഗേഷൻ-ജല അതോറിറ്റി ഉദ്യോഗസ്ഥർ, കരാറുകാരുടെ പ്രതിനിധികൾ തുടങ്ങിയവർ യോഗത്തിലും തുടർന്ന് നടന്ന സ്ഥലപരിശോധനയിലും പങ്കെടുത്തു.