ഇൻസ്റ്റഗ്രാം പോസ്റ്റിനെച്ചൊല്ലി അടി; കല്ലാച്ചി എം.ഇ.ടി കോളജിൽ വിദ്യാർഥികൾ തമ്മിൽ കൂട്ടത്തല്ല്

കല്ലാച്ചി: ഇൻസ്റ്റഗ്രാം പോസ്റ്റിനെച്ചൊല്ലിയുള്ള തർക്കത്തെ തുടർന്ന് കല്ലാച്ചി എം.ഇ.ടി. കോളജിൽ സീനിയർ - ജൂനിയർ വിദ്യാർഥികൾ തമ്മിൽ വീണ്ടും കൂട്ടത്തല്ലും സംഘർഷവുമുണ്ടായി. കഴിഞ്ഞ വെള്ളിയാഴ്ച സമാനമായ വിഷയത്തിൽ വിദ്യാർഥികൾ തമ്മിൽ സംഘർഷമുണ്ടായിരുന്നു. രണ്ടു ദിവസത്തെ അവധിക്കൊടുവിൽ ഇന്ന് കോളജ് തുറന്നതിന് പിന്നാലെയാണ് വീണ്ടും ഏറ്റുമുട്ടലുണ്ടായത്.

​ഇൻസ്റ്റഗ്രാം പേജുമായി ബന്ധപ്പെട്ട തർക്കം വിദ്യാർഥികൾക്കിടയിൽ വാക്കേറ്റത്തിലും തുടർന്ന് കോളജ് ക്യാമ്പസിലും പരിസരത്തുമായി ചേരിതിരിഞ്ഞുള്ള അടിപിടിയിലും കലാശിക്കുകയായിരുന്നു. കോളജ് ക്യാമ്പസിൽ തുടങ്ങിയ സംഘർഷം പിന്നീട് തുണേരി പട്ടാണിയിലേക്കും നാദാപുരം ഗവൺമെന്റ് ആശുപത്രി പരിസരത്തേക്കും വ്യാപിച്ചു. സംഭവത്തിൽ നിരവധി വിദ്യാർഥികൾക്ക് പരിക്കേറ്റിട്ടുണ്ട്.

​വിവരമറിഞ്ഞ് നാദാപുരത്തുനിന്ന് വൻ പൊലീസ് സംഘം സ്ഥലത്തെത്തി. സംഘർഷത്തിലേർപ്പെട്ട വിദ്യാർഥികളെ പിരിച്ചുവിടാൻ പൊലീസ് ലാത്തിവീശി. ഇതോടെ വിദ്യാർഥികൾ സ്ഥലത്തുനിന്ന് പിരിഞ്ഞുപോയി. പരിക്കേറ്റ വിദ്യാർഥികൾ നാദാപുരം ഗവൺമെന്റ് ആശുപത്രിയിൽ ചികിത്സ തേടിയശേഷം മടങ്ങി. സംഭവത്തിൽ ഇതുവരെയാരും ഔദ്യോഗികമായി പരാതി നൽകിയിട്ടില്ല.

​എന്നാൽ, ഏത് പോസ്റ്റിനെച്ചൊല്ലിയാണ് തർക്കമുണ്ടായതെന്ന കാര്യത്തിൽ ഇതുവരെ വ്യക്തത വന്നിട്ടില്ല. കൃത്യമായ കാരണം എന്താണെന്ന് കോളജ് മാനേജ്‌മെന്റിനും അറിയില്ലെന്നാണ് വിശദീകരണം. സമാനമായ വിഷയത്തിൽ തുടർച്ചയായ ദിവസങ്ങളിൽ കോളജിൽ സംഘർഷമുണ്ടായത് മറ്റ് വിദ്യാർഥികളിലും രക്ഷിതാക്കളിലും വലിയ ആശങ്കയ്ക്ക് ഇടയാക്കിയിട്ടുണ്ട്.