ഗ്യാനേഷ് കുമാറിന്റെ രാജിക്കായി മുറവിളി; ജന്തർമന്തർ പ്രതിഷേധങ്ങൾക്ക് ഐക്യദാർഢ്യം പകർന്ന് കോഴിക്കോടും പ്രതിഷേധച്ചൂട്

കോഴിക്കോട്: മുഖ്യതിരഞ്ഞെടുപ്പ് കമ്മിഷണറുടെ രാജി ആവശ്യപ്പെട്ട് ഡൽഹി ജന്തർമന്തറിൽ നടക്കുന്ന പ്രതിഷേധങ്ങൾക്ക് ഐക്യദാർഢ്യം പ്രകടിപ്പിച്ചും, നേതാക്കളെ അറസ്റ്റ് ചെയ്തതിൽ പ്രതിഷേധിച്ചും ശനിയാഴ്ച കോഴിക്കോട്ട് രാപകൽ ഭേദമില്ലാതെ ശക്തമായ പ്രതിഷേധങ്ങൾ നടന്നു. പകൽ വിവിധ രാഷ്ട്രീയ പാർട്ടികളുടെ നേതൃത്വത്തിൽ നടന്ന പ്രകടനങ്ങൾക്ക് പുറമേ, വൈകീട്ടും രാത്രിയിലുമായി സി.ജെ.പി.യുടെയും വിവിധ വിദ്യാർഥി-യുവജന സംഘടനകളുടെയും നേതൃത്വത്തിൽ ബീച്ച് കേന്ദ്രീകരിച്ചും നഗരത്തിന്റെ വിവിധ ഭാഗങ്ങളിലും പ്രതിഷേധസംഗമങ്ങളും അരങ്ങേറി.

​ജന്തർമന്തർ പ്രതിഷേധത്തിനിടെയുണ്ടായ സി.പി.എം. നേതാക്കളുടെ അറസ്റ്റിൽ പ്രതിഷേധിച്ച് സി.പി.എം. ജില്ലാ കമ്മിറ്റി നഗരത്തിൽ പ്രതിഷേധ പ്രകടനം സംഘടിപ്പിച്ചു. പ്രകടനം സി.പി.എം. സംസ്ഥാന സെക്രട്ടേറിയറ്റംഗം പി.എ. മുഹമ്മദ് റിയാസ് എം.എൽ.എ. ഉദ്ഘാടനം ചെയ്തു. ജില്ലാ സെക്രട്ടറി എം. മെഹബൂബ്, സംസ്ഥാന കമ്മിറ്റിയംഗം എ. പ്രദീപ് കുമാർ, ജില്ലാ സെക്രട്ടറിയറ്റംഗങ്ങളായ മാമ്പറ്റ ശ്രീധരൻ, ടി. വിശ്വനാഥൻ, എം. ഗിരീഷ്, സി.പി. മുസാഫർ അഹമ്മദ്, പി. നിഖിൽ തുടങ്ങിയവർ പരിപാടിയിൽ സംബന്ധിച്ചു.

​ഇതിനുപുറമേ, സി.ജെ.പി. സംസ്ഥാന ഘടകത്തിന്റെ നേതൃത്വത്തിൽ കോഴിക്കോട് ബീച്ചിൽ വൈകീട്ട് സമരപരിപാടി നടന്നു. 'വേക്ക് അപ് കേരള' അടക്കമുള്ള നിരവധി സംഘടനകൾ ഈ സമരത്തിന് പിന്തുണയുമായി രംഗത്തെത്തി. മുഖ്യ തിരഞ്ഞെടുപ്പ് കമ്മിഷണറുടെയും പ്രധാനമന്ത്രിയുടെയും രാജി ആവശ്യപ്പെട്ടും, സി.ജെ.പി. നേതാക്കളെ അറസ്റ്റ് ചെയ്തതിൽ പ്രതിഷേധിച്ചുമായിരുന്നു ഈ കൂട്ടായ്മ. വിദ്യാർഥി-യുവജന പ്രക്ഷോഭങ്ങളെ അടിച്ചമർത്തുന്ന കേന്ദ്ര സർക്കാർ നടപടിക്കെതിരെ ഫ്രറ്റേണിറ്റി മൂവ്മെന്റും കോഴിക്കോട് ബീച്ചിൽ ജന്തർമന്തർ പ്രതിഷേധ സംഗമം സംഘടിപ്പിച്ചു. വെൽഫയർ പാർട്ടി ദേശീയ വൈസ് പ്രസിഡന്റ് ഹമീദ് വാണിയമ്പലം ഉദ്ഘാടനം ചെയ്ത പരിപാടിയിൽ സാമൂഹിക പ്രവർത്തകരായ ഗ്രോ വാസു, ഒ.പി. രവീന്ദ്രൻ, ഗാർഗി, എസ്.ഐ.ഒ. സംസ്ഥാന പ്രസിഡന്റ് അബ്ദുൽ വാഹിദ്, ജി.ഐ.ഒ. സംസ്ഥാന ജനറൽ സെക്രട്ടറി റിസ്വാന ഷെറിൻ തുടങ്ങിയവർ സംസാരിച്ചു.

​ഡൽഹിയിൽ ഇടതുപക്ഷ മുന്നണി നേതാക്കൾക്കുനേരെയുണ്ടായ ഭരണകൂടവേട്ടയിൽ കോൺഗ്രസ് സോഷ്യലിസ്റ്റ് പാർട്ടി പ്രവർത്തകരും പ്രതിഷേധവുമായി രംഗത്തെത്തി. എൽ.ഐ.സി. കോർണറിൽ നടന്ന പരിപാടി ജില്ലാ പ്രസിഡന്റ് മുക്കം മുഹമ്മദ് ഉദ്ഘാടനം ചെയ്തു. ഡൽഹി സമരത്തിന് ഐക്യദാർഢ്യം പ്രഖ്യാപിച്ച് 'യങ് ഡെമോക്രാറ്റ്സ്' കോഴിക്കോട് ജില്ലാ ഓർഗനൈസിങ് കമ്മിറ്റിയുടെ നേതൃത്വത്തിൽ നഗരത്തിൽ പ്രതിഷേധറാലിയും സംഘടിപ്പിച്ചു. കൂടാതെ, ഐ.എൻ.എൽ. കോഴിക്കോട് സൗത്ത് മണ്ഡലത്തിന്റെ നേതൃത്വത്തിൽ നടന്ന ഐക്യദാർഢ്യ സംഗമം സംസ്ഥാന പ്രസിഡന്റ് അഹമ്മദ് ദേവർകോവിൽ ഉദ്ഘാടനം ചെയ്തു. മുതലക്കുളം മൈതാനം പരിസരത്തുനിന്ന് ആരംഭിച്ച് കിഡ്സൺ കോർണറിൽ സമാപിച്ച പ്രകടനത്തിൽ നിരവധി പ്രവർത്തകർ അണിനിരന്നു.