മാസപ്പടി-ഹവാല ആരോപണം; പിണറായി വിജയനെ ഒന്നാം പ്രതിയാക്കി വിജിലൻസ് കേസെടുക്കും; ഹൈക്കോടതി ഉത്തരവ് അനുസരിച്ച് എഫ്.ഐ.ആർ. ഇടും

തിരുവനന്തപുരം: മാസപ്പടി-ഹവാല ആരോപണങ്ങളിൽ മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെ ഒന്നാം പ്രതിയാക്കി വിജിലൻസ് കേസെടുക്കും. തിരുവനന്തപുരം സ്പെഷ്യൽ ഇൻവെസ്റ്റിഗേഷൻ യൂണിറ്റായിരിക്കും കേസിന്റെ അന്വേഷണ ചുമതല വഹിക്കുന്നത്. ഹൈക്കോടതി ഉത്തരവിന്റെ അടിസ്ഥാനത്തിൽ തിങ്കളാഴ്ചയോടെ വിജിലൻസ് എഫ്.ഐ.ആർ. രജിസ്റ്റർ ചെയ്യുമെന്നാണ് ലഭിക്കുന്ന വിവരം. ഇതുസംബന്ധിച്ച ഹൈക്കോടതി ഉത്തരവ് വിജിലൻസ് ഡയറക്ടറേറ്റിൽ ലഭിച്ചിട്ടുണ്ടെന്നും, ക്രൈംബ്രാഞ്ച് ഇതുവരെയുള്ള അന്വേഷണ രേഖകൾ വിജിലൻസിന് കൈമാറിയിട്ടുണ്ടെന്നും അധികൃതർ അറിയിച്ചു.

​സർക്കാർ അപ്പീൽ പോകില്ല

​മാസപ്പടി കേസിൽ കേസെടുക്കണമെന്ന ഹൈക്കോടതി സിംഗിൾ ബെഞ്ച് ഉത്തരവിനെതിരെ സർക്കാർ അപ്പീൽ നൽകില്ല. കോടതി നിർദേശം പൂർണ്ണമായും അനുസരിക്കുമെന്നും സർക്കാർ അനാവശ്യ ധൃതി കാണിച്ചിട്ടില്ലെന്നും മുഖ്യമന്ത്രി പ്രതികരിച്ചിരുന്നു. പ്രാഥമികാന്വേഷണത്തിനായി എസ്.ഐ.ടി. രൂപീകരിച്ചത് റദ്ദാക്കിയത് ഉൾപ്പെടെയുള്ള ഹൈക്കോടതിയുടെ നടപടി സർക്കാരിനും ഭരണമുന്നണിക്കും കനത്ത തിരിച്ചടിയായിട്ടുണ്ട്.

​എൻഫോഴ്സ്മെന്റ് ഡയറക്ടറേറ്റ് (ഇ.ഡി.) സമർപ്പിച്ച വിവരങ്ങളിൽ കേസെടുക്കുന്നതിന് പര്യാപ്തമായ തെളിവുകളുണ്ടെന്ന് കോടതി നിരീക്ഷിച്ചു. അഴിമതിക്ക് വ്യക്തമായ തെളിവുകളുണ്ടായിട്ടും കേസ് രജിസ്റ്റർ ചെയ്ത് മുന്നോട്ടുപോകുന്നതിന് പകരം ക്രൈംബ്രാഞ്ചിന്റെ പ്രത്യേക അന്വേഷണ സംഘത്തെ നിയോഗിച്ചത് നിയമവിരുദ്ധമാണെന്നാണ് ഹൈക്കോടതി ഉത്തരവിലുള്ളത്. കാലതാമസമില്ലാതെ വേഗത്തിൽ അന്വേഷണം പൂർത്തിയാക്കണമെന്നും കോടതി കർശന നിർദേശം നൽകിയിട്ടുണ്ട്.