സംസ്ഥാനത്തെ 38 തദ്ദേശ വാർഡുകളിൽ ഉപതിരഞ്ഞെടുപ്പ്: വോട്ടെടുപ്പ് ആരംഭിച്ചു

തിരുവനന്തപുരം: സംസ്ഥാനത്തെ 38 തദ്ദേശ സ്വയംഭരണ വാർഡുകളിലേക്കുള്ള ഉപതിരഞ്ഞെടുപ്പ് വോട്ടെടുപ്പ് ആരംഭിച്ചു. തിങ്കളാഴ്ച രാവിലെ ഏഴു മണിയോടെയാണ് പോളിങ് ആരംഭിച്ചത്. വൈകീട്ട് ആറുമണിവരെ വോട്ടെടുപ്പ് തുടരും. കൊല്ലം, ആലപ്പുഴ ഒഴികെയുള്ള 12 ജില്ലകളിലായി 126 സ്ഥാനാർഥികളാണ് മത്സരരംഗത്തുള്ളത്. വോട്ടെണ്ണൽ ചൊവ്വാഴ്ച നടക്കും.

​ജനപ്രതിനിധികൾ എം.എൽ.എമാരായി തിരഞ്ഞെടുക്കപ്പെട്ടതിനെ തുടർന്ന് അംഗങ്ങൾ രാജിവെച്ച എട്ട് വാർഡുകൾ ഉൾപ്പെടെയാണ് ഉപതിരഞ്ഞെടുപ്പിലേക്ക് നീങ്ങിയത്. കൊച്ചി, കോഴിക്കോട് കോർപ്പറേഷനുകളിലെയും മട്ടന്നൂർ, ചിറ്റൂർ-തത്തമംഗലം, ചാലക്കുടി നഗരസഭകളിലെയും ഓരോ വാർഡുകളിലും തിരുവനന്തപുരം, കോട്ടയം, പാലക്കാട് ജില്ലാ പഞ്ചായത്തുകളിലെ ഓരോ ഡിവിഷനുകളിലും ഏഴ് ബ്ലോക്ക് പഞ്ചായത്ത് വാർഡുകളിലും 23 ഗ്രാമപഞ്ചായത്ത് വാർഡുകളിലുമാണ് വോട്ടെടുപ്പ് നടക്കുന്നത്.

​സംസ്ഥാനത്ത് പുതിയ സർക്കാർ അധികാരമേറ്റ ശേഷമുള്ള ആദ്യ ഉപതിരഞ്ഞെടുപ്പാണിത്. പ്രിയദർശിനി പദ്ധതി, ആശാ പ്രവർത്തകരുടെ ഓണറേറിയം വർധനവ്, സർക്കാരിന്റെ വികസന നയങ്ങൾ തുടങ്ങിയവ ചൂണ്ടിക്കാട്ടിയാണ് യു.ഡി.എഫ്. ജനവിധിയെ തേടുന്നത്. അതേസമയം പവർക്കട്ട് അടക്കമുള്ള വിഷയങ്ങൾ ഉന്നയിച്ചും പ്രതിപക്ഷമെന്ന നിലയിൽ കഴിഞ്ഞ സർക്കാരിന്റെ നേട്ടങ്ങൾ ഓർമ്മിപ്പിച്ചുമാണ് എൽ.ഡി.എഫ്. പ്രചാരണം കൊഴുപ്പിച്ചത്. ബി.ജെ.പിയും ശക്തമായ മത്സരവുമായി രംഗത്തുണ്ട്.