പരാജയപ്പെട്ടവരെ ചേർത്തുപിടിക്കുമ്പോൾ വിജയങ്ങൾ അർഥപൂർണമാവുന്നു: സുഭാഷ് ചന്ദ്രൻ

വടകര: ജീവിതത്തിന്റെ മത്സരങ്ങളിൽ വീണുപോയവരെയും പരാജയപ്പെട്ടവരെയും ചേർത്തുപിടിക്കുമ്പോഴാണ് നാം നേടുന്ന വിജയങ്ങൾ അർഥപൂർണമാവുന്നതെന്ന് സാഹിത്യകാരൻ സുഭാഷ് ചന്ദ്രൻ പ്രസ്താവിച്ചു. കെ.കെ. രമ എം.എൽ.എ.യുടെ വിദ്യാഭ്യാസ പരിപാടിയായ വൈബ് സംഘടിപ്പിച്ച 'വിജയാരവം 2026' ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഏതെങ്കിലും ചില വിഷയങ്ങൾക്കും തൊഴിലുകൾക്കും മാത്രം പ്രാധാന്യവും പ്രിയവുമേറുന്നത് ആരോഗ്യകരമായ അവസ്ഥയല്ലെന്നും അദ്ദേഹം ഓർമ്മിപ്പിച്ചു.

​എം.സി. പ്രമോദ് അധ്യക്ഷത വഹിച്ച ചടങ്ങിൽ റൂറൽ എസ്.പി. മെറിൻ ജോസഫ്, സബ് കളക്ടർ പി.പി. അർച്ചന എന്നിവർ മുഖ്യാതിഥികളായി പങ്കെടുത്തു. നഗരസഭാ ചെയർമാൻ പി.കെ. ശശി, ബ്ലോക്ക് പഞ്ചായത്ത് പ്രസിഡന്റ് കോട്ടയിൽ രാധാകൃഷ്ണൻ, കെ. ലീല, ഒ.കെ. കുഞ്ഞബ്ദുള്ള, ഷജിന കൊടക്കാട്ട്, ഷൈജി പ്രമോദ്, ടി.കെ. സിബി, ശശികുമാർ പുറമേരി, ആർ. ഷിജു, പവിത്രൻ മണ്ടോടി എന്നിവർ ചടങ്ങിൽ ആശംസകൾ നേർന്നു സംസാരിച്ചു.

​തുടർന്ന് നൂറുശതമാനം വിജയം കൈവരിച്ച സ്കൂളുകൾക്കും പ്ലസ് ടു, എസ്.എസ്.എൽ.സി., എൻ.എം.എം.എസ്. തുടങ്ങിയ പരീക്ഷകളിൽ ഉന്നതവിജയം നേടിയ വിദ്യാർഥികൾക്കും കെ.കെ. രമ എം.എൽ.എ. ഉപഹാരങ്ങൾ വിതരണം ചെയ്തു.