പത്തനംതിട്ടയിൽ പോലീസിന് നേരെ ആക്രമണം: എസ്ഐയ്ക്ക് മർദ്ദനം, മദ്യപിച്ചെത്തിയ യുവാവ് അറസ്റ്റിൽ

പെരുനാട്: വാഹന പരിശോധനയ്ക്കിടെ മദ്യലഹരിയിലെത്തിയ യുവാവ് സബ് ഇൻസ്പെക്ടറുടെ മൂക്കിന് ഇടിച്ച് പരിക്കേല്പിക്കുകയും യൂണിഫോം വലിച്ചുകീറുകയും ചെയ്തു. സംഭവത്തിൽ ചിറ്റാർ നീലിപിലാവ് സ്വദേശിയായ നിതിൻ രാജിനെ (27) പെരുനാട് പോലീസ് അറസ്റ്റ് ചെയ്തു. ആക്രമണത്തിൽ പെരുനാട് എസ്ഐ മിഥുൻ അശോകിനാണ് പരിക്കേറ്റത്.

​വെള്ളിയാഴ്ച വൈകിട്ട് ആറ് മണിയോടെ പെരുനാട് പൂവത്തുംമൂടിൽ വച്ചായിരുന്നു സംഭവം. പോലീസ് സംഘം വാഹന പരിശോധന നടത്തുന്നതിനിടെ സ്കൂട്ടറിലെത്തിയ നിതിൻ രാജ് മദ്യപിച്ചിട്ടുണ്ടെന്ന് വ്യക്തമായി. തുടർന്ന് വാഹനം കൂടുതൽ പരിശോധനയ്ക്കായി തടഞ്ഞതോടെ പ്രകോപിതനായ പ്രതി എസ്ഐയെ നേരിട്ട് ആക്രമിക്കുകയായിരുന്നു.

​പോലീസിന്റെ കൃത്യനിർവഹണം തടസ്സപ്പെടുത്തി ആക്രമണം അഴിച്ചുവിട്ട സംഭവത്തിൽ കേസെടുത്ത പോലീസ് പ്രതിയെ ഉടൻതന്നെ കസ്റ്റഡിയിലെടുത്തു. തുടർന്ന് റാന്നി ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.