ബൈക്കിൽ സഞ്ചരിക്കവെ മുള്ളൻപന്നിയുടെ ആക്രമണം: യുവാവിന്റെ കാലിൽ അഞ്ച് മുള്ളുകൾ തുളച്ചുകയറി

കോഴിക്കോട്: ബൈക്കിൽ സഞ്ചരിക്കുകയായിരുന്ന യുവാവിന് മുള്ളൻപന്നിയുടെ ആക്രമണത്തിൽ സാരമായി പരിക്കേറ്റു. ഒളവണ്ണ ഭൂഖണ്ഡപുരം സ്വദേശി അബ്ദുൽ ഗഫൂറിനാണ് (21) മുള്ളൻപന്നിയുടെ ആക്രമണത്തിൽ കാലിൽ മുള്ളുകൾ തുളച്ചുകയറി പരിക്കേറ്റത്. പാലാഴി എം.എൽ.എ റോഡിൽ പുലർച്ചെ നാലുമണിയോടെയായിരുന്നു സംഭവം.

​മറ്റൊരു വാഹനാപകടത്തിൽ പരിക്കേറ്റ് കോഴിക്കോട് മെഡിക്കൽ കോളേജ് ആശുപത്രിയിൽ നിന്ന് പ്രാഥമിക ചികിത്സ തേടിയ ശേഷം സുഹൃത്തിനൊപ്പം ബൈക്കിൽ വീട്ടിലേക്ക് മടങ്ങുമ്പോഴാണ് ഗഫൂറിന് മുള്ളൻപന്നിയുടെ ആക്രമണം നേരിടേണ്ടി വന്നത്. യുവാവിന്റെ കാലിൽ അഞ്ചോളം മുള്ളുകളാണ് തുളച്ചുകയറിയത്.

​ഇതിൽ മൂന്ന് മുള്ളുകൾ സംഭവസ്ഥലത്തു വച്ചുതന്നെ എടുത്തുമാറ്റിയിരുന്നു. എന്നാൽ മറ്റു രണ്ടെണ്ണം കാൽവിരലിന്റെ അടിഭാഗത്തുനിന്ന് മുകളിലേക്ക് തുളച്ചുകയറിയ നിലയിലായതിനാൽ കോഴിക്കോട് ബീച്ച് ആശുപത്രിയിൽ എത്തിച്ചാണ് ശസ്ത്രക്രിയയിലൂടെ പുറത്തെടുത്തത്. ഗഫൂർ നിലവിൽ നിരീക്ഷണത്തിൽ തുടരുകയാണ്. ബൈക്കിലുണ്ടായിരുന്ന സുഹൃത്ത് പരിക്കേൽക്കാതെ രക്ഷപ്പെട്ടു.