തെരുവുനായയുടെ കടിയേറ്റ യുവതിക്ക് 52,000 രൂപ നഷ്ടപരിഹാരം നൽകാൻ കീഴരിയൂർ ഗ്രാമപഞ്ചായത്ത്

കോഴിക്കോട്: തെരുവുനായയുടെ കടിയേറ്റ യുവതിക്ക് 52,000 രൂപ നഷ്ടപരിഹാരം നൽകാൻ കൊയിലാണ്ടി താലൂക്കിലെ കീഴരിയൂർ ഗ്രാമപഞ്ചായത്ത് ഭരണസമിതി തീരുമാനിച്ചു. 2014 മാർച്ച് മാസത്തിൽ നടുവത്തൂർ കുറുമയിൽ താഴെ റോഡിൽ വെച്ച് തെരുവുനായയുടെ ആക്രമണത്തിനിരയായ അമൃതപ്രിയ ലാലീസ് എന്ന യുവതിക്കാണ് നിയമപോരാട്ടത്തിനൊടുവിൽ അർഹമായ തുക ലഭിക്കുന്നത്. തെരുവുനായുടെ ആക്രമണത്തിനിരയാകുന്നവർക്ക് തദ്ദേശ സ്ഥാപനങ്ങളിൽ നിന്ന് നഷ്ടപരിഹാരം ലഭ്യമാക്കുന്നതിൽ നിർണ്ണായക വഴിത്തിരിവാണ് ഈ തീരുമാനം.

​ജില്ലാ ലീഗൽ സർവീസസ് സൊസൈറ്റിയുടെ 'സ്ട്രേ ഡോഗ് വിക്ടിം കോംപൻസേഷൻ റെക്കമന്റേഷൻ കമ്മിറ്റി' നൽകിയ ഉത്തരവിന്റെ അടിസ്ഥാനത്തിലാണ് കഴിഞ്ഞ ദിവസം ചേർന്ന പഞ്ചായത്ത് ഭരണസമിതി യോഗം തുക അനുവദിക്കാൻ തീരുമാനമെടുത്തത്.

​പ്രദേശത്ത് തെരുവുനായ നിയന്ത്രണത്തിനായുള്ള പ്രതിരോധ നടപടികൾ ശക്തമാക്കുമെന്നും വളർത്തുനായകൾക്ക് ലൈസൻസ് നിർബന്ധമാക്കാൻ കർശന നടപടി സ്വീകരിക്കുമെന്നും പഞ്ചായത്ത് പ്രസിഡന്റ് പി.കെ. ബാബു അറിയിച്ചു.