ബാലികയെ ശല്യം ചെയ്ത കേസ്: വയോധികന് 10 വർഷം കഠിന തടവും പിഴയും

നാദാപുരം: ബാലികയെ ശല്യം ചെയ്തെന്ന കേസിൽ പ്രതിക്ക് 10 വർഷം കഠിന തടവും 20,000 രൂപ പിഴയും ശിക്ഷ. മേപ്പയൂരിനടുത്ത് കാരയാട് തിരുവങ്ങായൂർ കല്ലാത്തറ പി.പി.കുമാരനെയാണ് (75) നാദാപുരം ഫാസ്റ്റ് ട്രാക്ക് സ്‌പെഷ്യൽ കോടതി ജഡ്ജി ദേവൻ.കെ മേനോൻ ശിക്ഷിച്ചത്. 2025 ഏപ്രിൽ 27ന് ബാലികയെ വീട്ടിനകത്തേക്ക് കൂട്ടിക്കൊണ്ട് പോയി ലൈംഗിക ഉപദ്രവം നടത്തിയെന്നതാണ് കേസ്.

മേപ്പയ്യൂർ പോലീസ് സ്റ്റേഷനിൽ നൽകിയ പരാതിയുടെ അടിസ്ഥാനത്തിൽ രജിസ്റ്റർ ചെയ്ത കേസിൽ 10 സാക്ഷികളെ വിസ്തരിക്കുകയും 15 രേഖകൾ ഹാജരാക്കുകയും ചെയ്തു. മേപ്പയ്യൂർസബ് ഇൻസ്‌പെക്ടർമാരായ വിനീഷ്.വി.എം, വിനീത് വിജയൻ എന്നിവരാണ് കേസ് അന്വേഷിച്ച് കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി സ്‌പെഷ്യൽ പബ്ലിക് പ്രോസിക്യൂട്ടർ മനോജ് അരൂർ ഹാജരായി.