അപ്രതീക്ഷിത മഴയിൽ വിറച്ച് കേരളം; മണ്ണിടിച്ചിലിലും മലവെള്ളപ്പാച്ചിലിലും 9 മരണം

തിരുവനന്തപുരം: ബംഗാൾ ഉൾക്കടലിൽ അതിതീവ്ര ന്യൂനമർദ സാധ്യതയുള്ളതിനാൽ സംസ്ഥാനത്ത് വരും ദിവസങ്ങളിലും മഴ തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. അതേസമയം, കഴിഞ്ഞ ദിവസം അപ്രതീക്ഷിതമായി പെയ്ത കനത്ത മഴയിലുണ്ടായ മലവെള്ളപ്പാച്ചിലിലും മണ്ണിടിച്ചിലിലും പെട്ട് 9 പേർ മരണപ്പെട്ടു. കാണാതായ ഒരാൾക്കായുള്ള തിരച്ചിൽ തുടരുകയാണ്. ഇടുക്കി, എറണാകുളം, തൃശൂർ ജില്ലകളിൽ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വേഗതയിലുള്ള കാറ്റിനും സാധ്യതയുണ്ട്.

​ഇന്നലെ മണ്ണിടിഞ്ഞ് രണ്ടുപേർ മരിച്ച ഇടുക്കി ജില്ലയിൽ ഇടവിട്ട് ശക്തമായ മഴ തുടരുകയാണ്. ദേശീയപാതയിൽ അഞ്ചിടങ്ങളിൽ മണ്ണിടിഞ്ഞ് ഗതാഗതം തടസ്സപ്പെടുകയും പഴംപള്ളിചാലിൽ ഉരുൾപൊട്ടി അഞ്ച് കുടുംബങ്ങളെ മാറ്റിപ്പാർപ്പിക്കുകയും ചെയ്തു. ദേവിയാർ പുഴ കരകവിഞ്ഞതിനെ തുടർന്ന് താഴ്ന്ന പ്രദേശങ്ങളിൽ വെള്ളം കയറി. വട്ടവടയിൽ മണ്ണിടിച്ചിലിൽ മരണപ്പെട്ട ബാലകൃഷ്ണൻ, ചിന്നു എന്നിവരുടെ സംസ്‌കാരം ഇന്ന് നടക്കും. ഗുരുതരമായി പരിക്കേറ്റ ബാലകൃഷ്ണന്റെ ഭാര്യ മാരിയമ്മ ചികിത്സയിലാണ്.

​മലപ്പുറം ജില്ലയിലെ ചോക്കാട് അപ്രതീക്ഷിതമായുണ്ടായ മലവെള്ളപ്പാച്ചിലിൽ തിരൂർ സ്വദേശികളായ രണ്ടുപേർ മരിച്ചു. ടി.കെ. നഗറിൽ കാണാതായവരിൽ മൂന്നുപേരുടെ മൃതദേഹം കൂടി കണ്ടെത്തിയിട്ടുണ്ട്. ഇവിടെ കാണാതായ മറ്റൊരാൾക്കായി തിരച്ചിൽ പുരോഗമിക്കുകയാണ്. കോട്ടയം മലയോര മേഖലയിലും വ്യാപക മണ്ണിടിച്ചിലും വെള്ളക്കെട്ടും രൂപപ്പെട്ടു. മീനച്ചിലാർ കരകവിഞ്ഞൊഴുകിയതിനെ തുടർന്ന് തിടനാട് മേസ്തിരിപ്പടിയിലും തലനാടും വീടുകളിൽ വെള്ളം കയറി. വീടിന് മുകളിലേക്ക് മണ്ണിടിഞ്ഞുവീണ് പെരിങ്ങളം സ്വദേശി ജോസഫും, വാഗമൺ-ഈരാറ്റുപേട്ട റോഡിൽ വാഹനത്തിന് മുകളിലേക്ക് മണ്ണിടിഞ്ഞ് തമിഴ്‌നാട് സ്വദേശി സംഗീതയും മരണപ്പെട്ടു.

​എറണാകുളത്ത് മലയോര മേഖലയിൽ കനത്ത ജാഗ്രതാ നിർദേശം നൽകിയിട്ടുണ്ട്. ജലാശയങ്ങളിൽ ജലനിരപ്പ് ഉയർന്ന സാഹചര്യത്തിൽ താഴ്ന്ന പ്രദേശങ്ങളിലും മലയോര മേഖലകളിലും പ്രത്യേക ജാഗ്രത വേണമെന്ന് അധികൃതർ അറിയിച്ചു. കൂടാതെ കള്ളക്കടൽ പ്രതിഭാസത്തിന്റെ സാധ്യത കണക്കിലെടുത്ത് ആലപ്പുഴ, എറണാകുളം, തൃശൂർ ജില്ലകളിൽ രാത്രി 8.30 വരെ തീരദേശ ജാഗ്രതാ നിർദേശവും പുറപ്പെടുവിച്ചിട്ടുണ്ട്.