പേരാമ്പ്രയിലെ റോഡ് പ്രവൃത്തികൾ വേഗത്തിൽ പൂർത്തിയാക്കാൻ തീരുമാനം

പേരാമ്പ്ര: നിയോജകമണ്ഡലത്തിലെ വിവിധ പ്രദേശങ്ങളിൽ ഊരാളുങ്കൽ ലേബർ കോൺട്രാക്ട് സൊസൈറ്റി നിർമാണം ഏറ്റെടുത്ത റോഡ് പ്രവൃത്തികൾ വേഗത്തിൽ പൂർത്തീകരിക്കാൻ ഫാത്തിമ തഹിലിയ എം.എൽ.എ.യുടെ നേതൃത്വത്തിൽ ചേർന്ന അവലോകനയോഗത്തിൽ തീരുമാനമായി. നവംബർ 30-നകം നടന്നുവരുന്ന പദ്ധതികളിൽ 90 ശതമാനം പ്രവൃത്തികളും പൂർത്തിയാക്കാൻ സാധിക്കുമെന്ന് ബന്ധപ്പെട്ട ഉദ്യോഗസ്ഥർ എം.എൽ.എ.ക്ക് യോഗത്തിൽ ഉറപ്പുനൽകി.

​മേപ്പയ്യൂർ-ചെറുവണ്ണൂർ റോഡ്, പന്നിമുക്ക്-ആവള റോഡ്, കൽപ്പത്തൂർ വെള്ളിയൂർ കാപ്പുമ്മൽ റോഡ്, പെരുവണ്ണാമൂഴി മുതുകാട് പേരാമ്പ്ര പ്ലാൻ്റേഷൻ റോഡ്, പാറക്കടവ് പാലം, പൂഴിത്തോട് പാലം, തിമിരിപ്പുഴ പാലം, മലയോര ഹൈവേ, ചങ്ങരംകുളം-ഏക്കാട്ടൂർ റോഡ്, കൽപ്പത്തൂർ-വെള്ളിയൂർ റോഡ്, പേരാമ്പ്ര-ചാനിയംകടവ് റോഡ് ഉൾപ്പെടെയുള്ള നിർമാണങ്ങളുടെ നിലവിലെ പുരോഗതിയും തടസ്സങ്ങളും യോഗത്തിൽ വിശദമായി ചർച്ചചെയ്തു.

​നിരവധി റോഡുകളുടെ നിർമാണം പാതിവഴിയിലാകുകയും ഇഴഞ്ഞുനീങ്ങുകയും ചെയ്യുന്നതിനാൽ പ്രദേശവാസികൾ കടുത്ത യാത്രാദുരിതത്തിലാണ്. മഴ മാറിയിട്ടും ടാറിങ് പ്രവൃത്തികൾ ആരംഭിക്കാത്തതിനെ തുടർന്ന് വിവിധ സംഘടനകൾ പ്രതിഷേധവുമായി രംഗത്തെത്തിയ പശ്ചാത്തലത്തിലാണ് എം.എൽ.എ. അടിയന്തര യോഗം വിളിച്ചുചേർത്തത്.

​ജനപ്രതിനിധികളും തദ്ദേശസ്വയംഭരണ സ്ഥാപനങ്ങളിലെയും പി.ഡബ്ല്യു.ഡി.യിലെയും എൻജിനിയറിങ് വിഭാഗം ഉദ്യോഗസ്ഥരും ചർച്ചയിൽ പങ്കെടുത്തു. ചക്കിട്ടപാറ പഞ്ചായത്ത് വൈസ് പ്രസിഡൻ്റ് ജിതേഷ് മുതുകാട്, ചെറുവണ്ണൂർ പഞ്ചായത്ത് വൈസ് പ്രസിഡൻ്റ് മൊയ്തു കിണറുള്ളതിൽ, യു.എൽ.സി.സി. വൈസ് ചെയർമാൻ എം.എം. സുരേന്ദ്രൻ തുടങ്ങിയവർ യോഗത്തിൽ സംസാരിച്ചു.