കൊയിലാണ്ടി താലൂക്കാശുപത്രി മോർച്ചറി: താത്‌കാലിക സംവിധാനമൊരുക്കുന്നതിലും അനിശ്ചിതത്വം

കൊയിലാണ്ടി: പുതിയ കെട്ടിട നിർമാണത്തിന്റെ ഭാഗമായി പഴയ മോർച്ചറി പൊളിച്ചുനീക്കിയതോടെ കൊയിലാണ്ടി താലൂക്കാശുപത്രിയിൽ പോസ്റ്റ്മോർട്ടം നടപടികൾ പൂർണ്ണമായി തടസ്സപ്പെട്ടു. പുതിയ കെട്ടിടം പൂർത്തിയാകാൻ സമയമെടുക്കുമെന്നതിനാൽ താത്കാലിക മോർച്ചറി നിർമിക്കാൻ റവന്യൂഭൂമി വിട്ടുനൽകണമെന്ന ആവശ്യത്തിൽ തീരുമാനം വൈകുകയാണ്. നിലവിൽ അസ്വാഭാവിക മരണങ്ങളിൽ മൃതദേഹങ്ങൾ പോസ്റ്റ്‌മോർട്ടത്തിനായി കോഴിക്കോട് മെഡിക്കൽ കോളേജിലേക്ക് കൊണ്ടുപോകേണ്ടിവരുന്നത് ബന്ധുക്കൾക്ക് കടുത്ത സാമ്പത്തിക ബാധ്യതയും ബുദ്ധിമുട്ടും സൃഷ്ടിക്കുന്നുണ്ട്.

​പ്രശ്നപരിഹാരത്തിനായി ആശുപത്രിക്ക് പിന്നിലുള്ള റവന്യൂവകുപ്പിന്റെ 10 സെൻ്റ് സ്ഥലം വിട്ടുനൽകണമെന്ന് ആവശ്യപ്പെട്ട് ആശുപത്രി വികസനസമിതി ജില്ലാ കളക്ടർക്ക് നിവേദനം നൽകിയിട്ടുണ്ട്. കഴിഞ്ഞമാസം സ്ഥലം സന്ദർശിച്ച ആരോഗ്യമന്ത്രി കെ. മുരളീധരൻ വിഷയത്തിൽ അടിയന്തര നടപടിക്ക് നിർദേശം നൽകിയിരുന്നു. കളക്ടറുടെ അനുമതി ലഭിച്ചാൽ ഉടൻ താത്കാലിക കെട്ടിടത്തിന്റെ നിർമാണം ആരംഭിക്കുമെന്ന് കൊയിലാണ്ടി നഗരസഭാ ചെയർമാൻ യു.കെ. ചന്ദ്രൻ വ്യക്തമാക്കി. താത്കാലിക സംവിധാനം സജ്ജമായി പോസ്റ്റ്മോർട്ടം പുനരാരംഭിച്ചാൽ പോലീസ് സർജനെ നിയമിക്കുമെന്ന് ആരോഗ്യമന്ത്രിയും ഉറപ്പുനൽകിയിട്ടുണ്ട്.

​നിലവിൽ താലൂക്കാശുപത്രിയിൽ ആവശ്യമായ ഫ്രീസർ ലഭ്യമാണെങ്കിലും മോർച്ചറി കെട്ടിടമില്ലാത്തതിനാൽ ഇത് ഉപയോഗിക്കാനാവാതെ കിടക്കുകയാണ്. പുതിയ കെട്ടിടത്തിന്റെ പ്ലാനിൽ മോർച്ചറി കൂടി ഉൾപ്പെടുത്തിയിട്ടുണ്ടെങ്കിലും നിർമാണം പൂർത്തിയാകാൻ ഇനിയും വൈകുമെന്നതിനാലാണ് താത്കാലിക സംവിധാനമെങ്കിലും വേഗത്തിലാക്കണമെന്ന ആവശ്യം ശക്തമാകുന്നത്.