സി.പി.എം. വിപുലീകൃത സംസ്ഥാനകമ്മിറ്റി: ചുവപ്പണിഞ്ഞ് നഗരം; ഒരുക്കങ്ങൾ പൂർണം

കോഴിക്കോട്: ഞായറാഴ്‌ചമുതൽ മൂന്നുദിവസമായി നടക്കുന്ന സി.പി.എം. വിപുലീകൃത സംസ്ഥാനകമ്മിറ്റിയോഗത്തിനായി കോഴിക്കോട് നഗരം ചുവപ്പണിഞ്ഞൊരുങ്ങി. 2012-ലെ പാർട്ടി കോൺഗ്രസിനുശേഷം നഗരത്തിൽ നടക്കുന്ന ഏറ്റവും വലിയ പാർട്ടി പരിപാടിയാണിത്. പ്രധാന റോഡുകളെല്ലാം കൊടിതോരണങ്ങളാൽ നിറഞ്ഞു. 300-ലധികം പ്രതിനിധികൾ പങ്കെടുക്കുന്ന യോഗത്തിന്റെ പ്രധാന വേദി ജില്ലാ കമ്മിറ്റി ഓഫീസിലെ എ.കെ.ജി. ഓഡിറ്റോറിയമാണ്.

​15-ന് വൈകീട്ട് മൂന്നിന് ബീച്ച് ഫ്രീഡം സ്ക്വയറിൽ നടക്കുന്ന കൂറ്റൻ റാലിയോടെ പരിപാടി സമാപിക്കും. വിവിധ ഭാഗങ്ങളിൽനിന്ന് 1200-ലേറെ വാഹനങ്ങളിലായെത്തുന്ന പ്രവർത്തകർ ചെറുജാഥകളായി ഫ്രീഡം സ്ക്വയറിൽ സംഗമിക്കും. റാലിയിൽ ഗ്രീൻ പ്രോട്ടോക്കോൾ കർശനമായി പാലിക്കും.

​അഖിലേന്ത്യാ ജനറൽ സെക്രട്ടറി എം.എ. ബേബി, സംസ്ഥാന സെക്രട്ടറി എം.വി. ഗോവിന്ദൻ, പിണറായി വിജയൻ എന്നിവരുൾപ്പെടെയുള്ള മുതിർന്ന നേതാക്കളും പൊളിറ്റ്ബ്യൂറോ അംഗങ്ങളും ശനിയാഴ്ചയോടെ കോഴിക്കോട്ടെത്തി. യോഗത്തിൽ പങ്കെടുക്കുന്നവർക്കായി വെസ്റ്റ്ഹിൽ ഗസ്റ്റ്ഹൗസ് ഉൾപ്പെടെ 14 ഹോട്ടലുകളിലാണ് താമസസൗകര്യം ഒരുക്കിയിട്ടുള്ളത്.