പി.എസ്.സി. ക്രമക്കേട്: ഉദ്യോഗസ്ഥർക്ക് ഗുരുതര വീഴ്ചയെന്ന് ക്രൈംബ്രാഞ്ച്; വകുപ്പുതല നടപടിക്ക് ശുപാർശ

തിരുവനന്തപുരം: പി.എസ്.സി. പരീക്ഷാ മൂല്യനിർണയത്തിലെ ക്രമക്കേടിൽ ചുമതലയുണ്ടായിരുന്ന ഉദ്യോഗസ്ഥർക്ക് ഗുരുതര വീഴ്ച സംഭവിച്ചതായി ക്രൈംബ്രാഞ്ച് അന്വേഷണ സംഘം കണ്ടെത്തി. 9 ചോദ്യങ്ങളുടെ മൂല്യനിർണയം നടത്താതെ പോയതിൽ ഉത്തരവാദികളായ മുൻ ഡെപ്യൂട്ടി സെക്രട്ടറി സതീഷ്, അഡിഷണൽ സെക്രട്ടറി ഹരി എന്നിവർക്കെതിരെ വകുപ്പുതല നടപടി സ്വീകരിക്കാൻ അന്വേഷണ സംഘം ശുപാർശ ചെയ്തു. ഡി.ജി.പി വഴി സർക്കാരിന് കൈമാറിയ കത്ത് പി.എസ്.സിക്ക് കൈമാറും.

​ഉദ്യോഗസ്ഥരുടെ ഭാഗത്തുനിന്നുണ്ടായ ഈ വീഴ്ച മുൻപ് തന്നെ ശ്രദ്ധയിൽപ്പെട്ടിട്ടും പി.എസ്.സി യാതൊരു നടപടിയും സ്വീകരിച്ചില്ലെന്നും അന്വേഷണ സംഘം വ്യക്തമാക്കി. സാങ്കേതിക തകരാർ മൂലമാണ് മൂല്യനിർണയം പൂർത്തിയാക്കാൻ കഴിയാതിരുന്നത് എന്നാണ് ഉദ്യോഗസ്ഥരുടെ വിശദീകരണമെങ്കിലും, സംഭവത്തിന് പിന്നിൽ ക്രിമിനൽ ഗൂഢാലോചന നടന്നിട്ടുണ്ടോ എന്ന കാര്യത്തിൽ ക്രൈംബ്രാഞ്ച് അന്വേഷണം തുടരുകയാണ്.