മാനസികരോഗം മാറിയിട്ടും ആശുപത്രിയിൽ തടവിലായി 183 പേർ; പുനരധിവാസം വൈകുന്നതിൽ പ്രതിഷേധം

​കൊല്ലം: മാനസികാരോഗ്യം വീണ്ടെടുത്തിട്ടും ബന്ധുക്കളും സർക്കാരും കൈവിട്ടതിനെ തുടർന്ന് സംസ്ഥാനത്തെ വിവിധ കേന്ദ്രങ്ങളിൽ കഴിയുന്നത് 183 പേർ. കോഴിക്കോട് കുതിരവട്ടത്ത് 88 പേരും തിരുവനന്തപുരം ഊളമ്പാറയിൽ 55 പേരും തൃശൂർ അരണാട്ടുകരയിൽ 40 പേരുമാണ് രോഗം പൂർണ്ണമായി ഭേദമായിട്ടും പുറത്തിറങ്ങാനാകാതെ കഴിയുന്നത്. തെറ്റായ മേൽവിലാസം നൽകി പ്രവേശിപ്പിക്കുന്നതിനാലും സമൂഹത്തിന്റെ വിമുഖത കാരണവും ബന്ധുക്കൾ ഇവരെ ഏറ്റെടുക്കാൻ തയ്യാറാകുന്നില്ല. കൂടാതെ കോടതി വഴി എത്തുന്ന തടവുകാരായ രോഗികളുടെ ശിക്ഷാകാലാവധി കഴിഞ്ഞാലും ഏറ്റെടുക്കാൻ ആളില്ലാത്ത അവസ്ഥയാണ്.

​സാമൂഹികനീതി വകുപ്പുമായി സഹകരിച്ച് എൻ.ജി.ഒകൾ വഴി പുനരധിവാസം സാധ്യമാക്കാനുള്ള സർക്കാർ പദ്ധതി പാതിവഴിയിൽ നിലച്ചു. മാനസികാരോഗ്യ കേന്ദ്രങ്ങളുടെ പേര് 'വെൽനസ് സെന്ററുകൾ' എന്ന് മാറ്റാൻ ആരോഗ്യവകുപ്പ് തീരുമാനിക്കുമ്പോഴും രോഗം മാറിയവർക്ക് തണലൊരുക്കാൻ കൃത്യമായ സംവിധാനമില്ലെന്ന് വിദഗ്ധർ ചൂണ്ടിക്കാണിക്കുന്നു. ഈ കേന്ദ്രങ്ങളിൽ ഗുരുതര മനുഷ്യാവകാശ ലംഘനങ്ങളാണ് നടക്കുന്നതെന്നും മരുന്ന് നൽകി ഉറക്കിക്കിടത്തുകയല്ല വേണ്ടതെന്നും വ്യക്തമാക്കി ഹൈക്കോടതിയും വിഷയത്തിൽ കടുത്ത ആശങ്ക പ്രകടിപ്പിച്ചിട്ടുണ്ട്.