പൊലീസ് ജീപ്പിടിച്ചയാളെ ആശുപത്രിയിൽ എത്തിച്ചില്ല; പുതുക്കാട് സ്റ്റേഷനിലെ നാല് ഉദ്യോഗസ്ഥർക്ക് സസ്പെൻഷൻ

തൃശൂർ: ക്രിമിനൽ കേസ് പ്രതികളെ പിന്തുടരുന്നതിനിടെ പൊലീസ് ജീപ്പ് ബൈക്കിലിടിച്ച് പരിക്കേറ്റ യുവാവിനെ ആശുപത്രിയിലെത്തിക്കാൻ തയ്യാറാകാതിരുന്ന സംഭവത്തിൽ പുതുക്കാട് പൊലീസ് സ്റ്റേഷനിലെ നാല് ഉദ്യോഗസ്ഥരെ സസ്പെൻഡ് ചെയ്തു. എസ്.ഐ സി.എം. മഹേഷ്, സി.പി.ഒമാരായ എം.യു. ഫൈസൽ, ഇ.സി. യദുകൃഷ്ണൻ, പി.ഡി. നവീൻകുമാർ എന്നിവർക്കെതിരെയാണ് തൃശൂർ ഡി.ഐ.ജി ടി. നാരായണൻ നടപടിയെടുത്തത്.

​ജൂലൈ 19-ന് തട്ടുകടയിൽ അടിപിടിയുണ്ടാക്കിയ സംഘത്തെ പിന്തുടരുന്നതിനിടയിലാണ് പൊലീസ് ജീപ്പിടിച്ച് ബൈക്ക് യാത്രികനായ വരന്തരപ്പിള്ളി സ്വദേശി അഭിഷേകിന് പരിക്കേറ്റത്. അപകടം സംഭവിച്ചിട്ടും വാഹനം നിർത്താതെ പോയതിനെ തുടർന്ന് പരിക്കേറ്റ അഭിഷേക് നൽകിയ പരാതിയിലാണ് ഉദ്യോഗസ്ഥർക്കെതിരെ നടപടിയുണ്ടായത്. സംഭവത്തിൽ കൂടുതൽ അന്വേഷണം നടത്തുമെന്ന് ഡി.ഐ.ജി വ്യക്തമാക്കി.