20 വർഷമായി ഉപയോഗിക്കാത്ത ക്യൂബ് ഐസ് നിർമാണ യൂണിറ്റ് പൊളിച്ചുനീക്കാൻ മനുഷ്യാവകാശ കമ്മീഷൻ നിർദേശം

കോഴിക്കോട്: മത്സ്യബന്ധന ബോട്ടുകളിൽ മീൻ കേടുകൂടാതെ സൂക്ഷിക്കാൻ 20 വർഷം മുൻപ് MPEDA സ്ഥാപിച്ച ക്യൂബ് ഐസ് നിർമാണ യൂണിറ്റ് അടിയന്തരമായി പൊളിച്ചുനീക്കാൻ മനുഷ്യാവകാശ കമ്മീഷൻ ഉത്തരവിട്ടു. പത്രവാർത്തയുടെ അടിസ്ഥാനത്തിൽ കമ്മീഷൻ ജുഡീഷ്യൽ അംഗം കെ. ബൈജുനാഥ് സ്വമേധയാ എടുത്ത കേസിലാണ് നടപടി. വെള്ളവും വൈദ്യുതിയും ലഭിക്കാത്തതിനാൽ ഇതുവരെ പ്രവർത്തിപ്പിക്കാത്ത ഈ പ്ലാന്റ് നിലവിൽ തുരുമ്പെടുത്ത് തകർച്ചയുടെ വക്കിലാണ്.

​പ്ലാന്റിന്റെ 80 ശതമാനം ഭാഗങ്ങളും നശിച്ചതായും, അഞ്ചടിയോളം ഉയരമുള്ള കോൺക്രീറ്റ് സ്ലാബിൽ വിള്ളലുകൾ വീണ് ആൽമരങ്ങൾ വളർന്നതായും ഫിഷറീസ് ഡെപ്യൂട്ടി ഡയറക്ടറുടെ റിപ്പോർട്ടിൽ വ്യക്തമാക്കുന്നു. ശക്തമായ കാറ്റിൽ യന്ത്രഭാഗങ്ങൾ തകർന്നുവീണ് അപകടമുണ്ടാകാൻ സാധ്യതയേറെയാണെന്ന് റിപ്പോർട്ട് ചൂണ്ടിക്കാട്ടുന്നു. നൂറുകണക്കിന് മത്സ്യത്തൊഴിലാളികൾ ജോലി ചെയ്യുന്ന മേഖലയായതിനാൽ പ്ലാന്റ് അടിയന്തരമായി പൊളിച്ചുനീക്കി അപകടസാധ്യത പൂർണ്ണമായും ഒഴിവാക്കണമെന്ന് കമ്മീഷൻ ഫിഷറീസ് ഡയറക്ടർക്ക് നിർദേശം നൽകി.