ചാലിയം തീരദേശത്ത് കടൽഭിത്തി നിർമാണം പുനരാരംഭിക്കുന്നു; 794 മീറ്ററിൽ പുതിയ സുരക്ഷാകവചമൊരുങ്ങും

ചാലിയം: പ്രതികൂല കാലാവസ്ഥയെയും ഓണാവധിയെയും തുടർന്ന് നിർത്തിവെച്ചിരുന്ന ചാലിയത്തെ കടൽഭിത്തി നിർമാണത്തിനായുള്ള കല്ലിടൽ പ്രവൃത്തികൾ വ്യാഴാഴ്ച പുനരാരംഭിക്കും. ബൈത്താനി മുതൽ കപ്പലങ്ങാടി-വാക്കടവ് വരെയുള്ള 794 മീറ്റർ തീരദേശത്താണ് ശാസ്ത്രീയമായ രീതിയിൽ പുതിയ കടൽഭിത്തി നിർമിക്കുന്നത്. വീടുകളോട് ചേർന്ന ഭാഗത്ത് കടലിലേക്ക് 100 മീറ്റർ വീതിയിലും കടൽനിരപ്പിൽ നിന്ന് മൂന്നര മീറ്റർ ഉയരത്തിലുമാണ് ഭിത്തി സജ്ജമാക്കുന്നത്. നിലവിലുള്ള ചെറിയ കല്ലുകൾ കടലിലേക്ക് തള്ളിയിട്ട് അതിനു മുകളിൽ വലിയ കല്ലുകൾ അടക്കി രണ്ടു നിരകളായാണ് നിർമാണം. ഇതിനായി 50-ലേറെ ലോഡ് കല്ലുകൾ ഇതിനകം ഇറക്കിയിട്ടുണ്ട്.

​കഴിഞ്ഞ ഇടതു സർക്കാരിന്റെ കാലത്ത് നവകേരള സദസ്സ് വഴി അനുവദിച്ച ആറ് കോടി രൂപ ചെലവഴിച്ചാണ് ജലസേചന വകുപ്പിന്റെ മേൽനോട്ടത്തിൽ ഈ പദ്ധതി നടപ്പിലാക്കുന്നത്. മുൻവർഷം നിർമിച്ച 89 മീറ്റർ ഭിത്തിയുടെ തുടർച്ചയായാണ് പുതിയ നിർമാണവും തകർന്ന ഭാഗങ്ങളുടെ നവീകരണവും നടക്കുന്നത്. കാലവർഷത്തിൽ കടലാക്രമണം രൂക്ഷമാകുകയും ഭിത്തി തകർന്ന് വെള്ളം കയറുകയും ചെയ്തതോടെ പ്രദേശവാസികൾ കടുപ്പിച്ച പ്രതിഷേധത്തിന് ശേഷമാണ് അധികൃതർ നടപടികൾ വേഗത്തിലാക്കിയത്. ജോലികൾ എത്രയും വേഗം പൂർത്തിയാക്കാൻ കരാറുകാരന് ജലസേചന വിഭാഗം കർശന നിർദേശം നൽകിയിട്ടുണ്ട്.