സി.പി.എമ്മിനെതിരെ രൂക്ഷവിമർശനവുമായി കാന്തപുരം സമസ്ത സംഘടനകൾ

മലപ്പുറം: സി.പി.എമ്മിനെതിരെ രൂക്ഷവിമർശനവുമായി കാന്തപുരം സമസ്ത സംഘടനകൾ രംഗത്ത്. പ്രത്യയശാസ്ത്ര ശാഠ്യം പാർട്ടി ക്ലാസുകളിൽ മതിയെന്ന് എസ്.എസ്.എഫ് വ്യക്തമാക്കി. പൊതുസമൂഹത്തിന് ഇടതുപക്ഷത്തിലുള്ള പ്രതീക്ഷ, കാലഹരണപ്പെട്ട കമ്മ്യൂണിസ്റ്റ് ആശയങ്ങളോടുള്ള സമ്മതിയല്ലെന്ന് ചൂണ്ടിക്കാട്ടിയ എസ്.വൈ.എസ്, ലോകമെമ്പാടും പരാജയപ്പെട്ട് ചരിത്രത്തിന്റെ ചവറ്റുകുട്ടയിലേക്ക് തള്ളപ്പെട്ടവർ വിശ്വാസികളുടെ ആഭ്യന്തര കാര്യങ്ങളിൽ ഇടപെടേണ്ടതില്ലെന്ന് മുന്നറിയിപ്പ് നൽകി.

​ഇത്തരം നിലപാടുകൾ പാർട്ടിക്ക് ബാക്കിയുള്ള ജനപിന്തുണ കൂടി ഇല്ലാതാക്കാനേ ഉപകരിക്കൂ എന്ന് സംഘടനകൾ വ്യക്തമാക്കി. വിശ്വാസി സമൂഹത്തിന്റെ ആചാര മര്യാദകൾക്ക് നേരെ കപട പുരോഗമനത്തിന്റെ ക്ലാസ് എടുക്കാൻ വരുന്ന പാർട്ടി നേതാക്കളുടെ ഇരട്ടത്താപ്പ് ദാരിദ്ര്യവും പരിഹാസ്യവുമാണെന്നും എസ്.വൈ.എസ് വിമർശിച്ചു. കാന്തപുരം എ.പി. അബൂബക്കർ മുസ്ലിയാരുടെ സ്ത്രീവിരുദ്ധ പരാമർശങ്ങൾക്കെതിരെ സി.പി.എം നേതാക്കൾ രംഗത്തെത്തിയതിന് പിന്നാലെയാണ് സമസ്ത സംഘടനകളുടെ ഈ രൂക്ഷമായ പ്രതികരണം.