ലോക്‌നാഥ് ബെഹ്‌റ കൊച്ചി മെട്രോ എം.ഡി. പദവി ഒഴിയുന്നു; എറണാകുളം കളക്ടർ ജി. പ്രിയങ്കയ്ക്ക് താൽക്കാലിക ചുമതല

കൊച്ചി: കൊച്ചി മെട്രോ റെയിൽ ലിമിറ്റഡിന്റെ (KMRL) മാനേജിങ് ഡയറക്ടർ പദവിയിൽ നിന്ന് മുൻ സംസ്ഥാന പോലീസ് മേധാവി ലോക്‌നാഥ് ബെഹ്‌റ സ്ഥാനമൊഴിയുന്നു. ഔദ്യോഗിക കാലാവധി ഈ മാസം 30-ന് അവസാനിക്കുന്ന സാഹചര്യത്തിലാണ് നീക്കം. പുതിയ സ്ഥിരം എം.ഡിയെ നിയമിക്കുന്നത് വരെ എറണാകുളം ജില്ലാ കളക്ടർ ജി. പ്രിയങ്കയ്ക്ക് കൊച്ചി മെട്രോയുടെ താൽക്കാലിക ചുമതല നൽകും.

​2021 ഓഗസ്റ്റിൽ എം.ഡിയായി ചുമതലയേറ്റ ബെഹ്‌റയ്ക്ക് എൽ.ഡി.എഫ്. സർക്കാർ രണ്ടുതവണ കാലാവധി നീട്ടിനൽകിയിരുന്നു. ഇത്തവണ കൂടുതൽ നീട്ടിനൽകേണ്ടതില്ലെന്നാണ് സർക്കാരിന്റെ തീരുമാനം. കൊച്ചി വാട്ടർ മെട്രോ യാഥാർഥ്യമാക്കിയതിലും രണ്ടാം ഘട്ട മെട്രോ നിർമാണം മുന്നോട്ടുകൊണ്ടുപോകുന്നതിലും ബെഹ്‌റ നിർണായക പങ്കുവഹിച്ചിരുന്നു. ഭരണനടപടികൾ തടസ്സപ്പെടാതിരിക്കാനാണ് താൽക്കാലിക ചുമതല ജില്ലാ കളക്ടർക്ക് കൈമാറുന്നത്. പുതിയ എം.ഡിയെ കണ്ടെത്തുന്നതിനുള്ള നടപടികൾ സർക്കാർ വേഗത്തിലാക്കിയിട്ടുണ്ട്.