പേരാമ്പ്ര ടൗണിൽ റോഡ് തകർന്ന് കുഴിയായി; ഗതാഗതക്കുരുക്കും അപകടസാധ്യതയും ഏറുന്നു

പേരാമ്പ്ര: കുറ്റ്യാടി-കോഴിക്കോട് സംസ്ഥാന പാതയിൽ പേരാമ്പ്ര-ചെമ്പ്ര റോഡ് കവലയ്ക്ക് സമീപം റോഡ് പൂർണമായി തകർന്ന് കൂറ്റൻ കുഴികൾ രൂപപ്പെട്ടിട്ടും പുനരുദ്ധാരണ നടപടികൾ വൈകുന്നു. അടുത്തിടെ കലുങ്ക് നിർമാണം നടന്ന ഈ ഭാഗത്ത് മാസങ്ങളോളം ടാറിങ് നടക്കാതിരുന്നത് വലിയ യാത്രാദുരിതം സൃഷ്ടിച്ചിരുന്നു. നിർമാണം കഴിഞ്ഞ് ഒരു വർഷം പൂർത്തിയാകുമ്പോഴേക്കും വീണ്ടും റോഡ് തകർന്ന് പൂർവസ്ഥിതിയിലായിരിക്കുകയാണ്.

​സമീപത്തെ കുന്നിൻ പ്രദേശത്തുനിന്ന് മഴവെള്ളം കുത്തിയൊലിച്ചെത്തുന്നതാണ് റോഡ് വേഗത്തിൽ തകരാൻ കാരണം. മഴ പെയ്യുമ്പോൾ കുഴികളിൽ വെള്ളം കെട്ടിക്കിടക്കുന്നതിനാൽ ആഴമറിയാതെ ഇരുചക്രവാഹനങ്ങൾ അപകടത്തിൽപെടുന്നത് പതിവാണ്. പേരാമ്പ്ര ടൗണിലെ തിരക്കേറിയ സമയങ്ങളിൽ വലിയ ഗതാഗതക്കുരുക്കിനും ഈ തകർച്ച കാരണമാകുന്നു.

​കൂടാതെ, കല്ലോട് പേരാമ്പ്ര ബൈപ്പാസ് കവലയ്ക്ക് സമീപം അടുത്തിടെ അറ്റകുറ്റപ്പണി നടത്തി നിരപ്പില്ലാതെ കോൺക്രീറ്റ് ചെയ്ത ഭാഗവും വാഹനയാത്രികർക്ക് വലിയ ഭീഷണിയുയർത്തുന്നുണ്ട്. എത്രയും വേഗം പാത ടാർ ചെയ്ത് ഗതാഗതയോഗ്യമാക്കണമെന്നാണ് പ്രദേശവാസികളുടെയും യാത്രക്കാരുടെയും ആവശ്യം.