കേരളത്തിന്റെ റെയിൽവേ വികസനത്തിന് തുരങ്കംവെക്കുന്ന നടപടി -പാസഞ്ചേഴ്‌സ് അസോ.

കോഴിക്കോട്: പാലക്കാട് റെയിൽവേ ഡിവിഷൻ വിഭജിക്കാനുള്ള കേന്ദ്ര തീരുമാനം കേരളത്തിന്റെ റെയിൽവേ വികസനത്തിന് കടുത്ത തുരങ്കംവെക്കലാണെന്നാരോപിച്ച് മലബാർ ട്രെയിൻ പാസഞ്ചേഴ്സ് വെൽഫെയർ അസോസിയേഷൻ പ്രതിഷേധസംഗമം നടത്തി. റെയിൽവേക്കും യാത്രക്കാർക്കും ഉപദ്രവകരമായ ഈ അശാസ്ത്രീയ നീക്കം പിൻവലിക്കണമെന്നും കേരളത്തിന്റെ വികസന കാര്യത്തിൽ അഭിപ്രായവ്യത്യാസങ്ങൾ മാറ്റിവെച്ച് സർവകക്ഷി ഐക്യം രൂപപ്പെടുത്തണമെന്നും യോഗം ആവശ്യപ്പെട്ടു. പ്രതിഷേധസംഗമം അസോസിയേഷൻ ജനറൽ സെക്രട്ടറി പി.പി. രാമനാഥൻ ഉദ്ഘാടനം ചെയ്തു.

​മംഗളൂരു മേഖല കൈവിട്ടുപോകുന്നതോടെ പാലക്കാട് ഡിവിഷന് പുതിയ ട്രെയിനുകൾ ലഭിക്കാനുള്ള സാധ്യതകൾ പൂർണമായും ഇല്ലാതാകുമെന്ന് രാമനാഥൻ ചൂണ്ടിക്കാട്ടി. വിഷയത്തിൽ ഇടപെടണമെന്ന് ആവശ്യപ്പെട്ട് കേന്ദ്ര റെയിൽവേ മന്ത്രിക്കും മുഖ്യമന്ത്രിക്കും റെയിൽവേ ബോർഡിനും അസോസിയേഷൻ ഇ-മെയിൽ അയച്ചിട്ടുണ്ട്.

​കേന്ദ്ര റെയിൽവേ മന്ത്രാലയത്തിന്റേത് മലബാറിന്റെ വികസനസ്വപ്നങ്ങളുടെ ചിറകരിയുന്ന സമീപനമാണെന്ന് അസോസിയേഷൻ ഓർഗനൈസിങ് സെക്രട്ടറി ഫിറോസ് ഫിസ കുറ്റപ്പെടുത്തി. ഭാരവാഹികളായ കെ.കെ. റസാഖ് ഹാജി തിരൂർ, പ്രമോദ് പന്നിയങ്കര, രതീഷ് ചെറുപ്പ, നിഷ, ജസ്വന്ത് ചേവായൂർ എന്നിവർ പ്രതിഷേധസംഗമത്തിന് നേതൃത്വം നൽകി.