അംഗീകാരം വൈകുന്നതിൽ പ്രതിസന്ധി: അനുമതി കാത്ത് കോഴിക്കോട്ടെ 'ആനന്ദവണ്ടി' സർവീസുകൾ

​കോഴിക്കോട്: വയോജനങ്ങളുടെ വിനോദയാത്രയ്ക്കായി ആരംഭിച്ച 'ആനന്ദവണ്ടി' പദ്ധതിയുടെ സർവീസുകൾ ജില്ലാ ആസൂത്രണസമിതിയുടെ അംഗീകാരം വൈകുന്നതിനെ തുടർന്ന് താത്കാലികമായി നിലച്ചു. കഴിഞ്ഞ ഒരുമാസത്തോളമായി യാത്രകളൊന്നും നടന്നിട്ടില്ല. കെ.എസ്.ആർ.ടി.സി. ബസ് പ്രത്യേകമായി രൂപമാറ്റം വരുത്തി നടപ്പിലാക്കിയ ഈ നൂതനപദ്ധതിക്കായി തദ്ദേശ സ്ഥാപനങ്ങൾ സർക്കാരിലേക്ക് നിർദ്ദേശം നൽകി അനുമതി വാങ്ങേണ്ടതുണ്ട്. പുതിയ സർക്കാർ അധികാരത്തിൽ വന്നതിന് ശേഷം ആസൂത്രണസമിതി പുനഃസംഘടിപ്പിക്കാൻ വൈകിയതാണ് പദ്ധതിയുടെ തുക അനുവദിക്കുന്നതിൽ തടസ്സമുണ്ടാക്കിയത്.

​കെ.എസ്.ആർ.ടി.സി.ക്ക് പ്രതിദിനം 11,000-ത്തിലധികം രൂപ വാടക നിശ്ചയിച്ചാണ് ബസ് ലഭ്യമാക്കുന്നത്. 30 യാത്രകൾക്കുള്ള തുക മുൻകൂറായി നൽകുന്ന രീതിയിലാണ് പ്രവർത്തനമെങ്കിലും കഴിഞ്ഞ പത്തോളം സർവീസുകളുടെ പണം കെ.എസ്.ആർ.ടി.സി.ക്ക് ഇനിയും നൽകാനുണ്ട്. എന്നാൽ നിലവിൽ ഫണ്ട് തടസ്സങ്ങളില്ലെന്നും മഴക്കാലമായതും പദ്ധതിയുടെ നൂതന സ്വഭാവം കാരണം പ്രത്യേക അംഗീകാരം ആവശ്യമുള്ളതുമാണ് സർവീസ് നിർത്തിവെക്കാൻ കാരണമായതെന്ന് അധികൃതർ വ്യക്തമാക്കി. സെപ്റ്റംബർ മാസത്തോടെ സർവീസുകൾ പുനരാരംഭിക്കാൻ കഴിയുമെന്നാണ് പ്രതീക്ഷ.

​2025 നവംബറിലാണ് 'പല പ്രായം ഒരുനഗരം' എന്ന ആശയത്തിലൂന്നി കോർപ്പറേഷൻ പരിധിയിലെ വയോജനങ്ങൾക്കായി ഈ പദ്ധതിക്ക് തുടക്കമിട്ടത്. വാർഡ് കൗൺസിലർമാർ മുഖേന സംഘടിപ്പിച്ചിരുന്ന ഈ യാത്രയിൽ 40 പേർക്കാണ് ഒരേസമയം യാത്ര ചെയ്യാനായിരുന്നത്. വളരെ ചുരുങ്ങിയ കാലയളവിനുള്ളിൽ 120-ഓളം സർവീസുകളിലായി 5000-ത്തോളം വയോജനങ്ങൾ കാപ്പാട്, ബേപ്പൂർ, സരോവരം തുടങ്ങിയ വിനോദസഞ്ചാര കേന്ദ്രങ്ങൾ സന്ദർശിക്കുകയും വലിയ സ്വീകാര്യത നേടുകയും ചെയ്തിരുന്നു.