ക്രിസ്ത്യൻ വിവാഹമോചന നിയമത്തിൽ നിർണായക വിധിയുമായി ഹൈക്കോടതി: ഹർജി ഭാര്യ താമസിക്കുന്ന സ്ഥലത്തെ കുടുംബകോടതിയിലും നൽകാം

കൊച്ചി: ക്രിസ്ത്യൻ വിവാഹമോചന നിയമത്തിൽ നിർണായക വിധിയുമായി കേരള ഹൈക്കോടതി. 1869-ലെ ക്രിസ്ത്യൻ വിവാഹമോചന നിയമത്തിലെ വ്യവസ്ഥകളിൽ വ്യക്തത വരുത്തിയാണ് ഹൈക്കോടതി ഡിവിഷൻ ബെഞ്ചിന്റെ ഉത്തരവ്. ഇനിമുതൽ വിവാഹം നടന്ന സ്ഥലത്തോ ഭർത്താവിന്റെ താലൂക്കിലോ മാത്രമായി ഹർജി നൽകേണ്ടതില്ലെന്നും, ഭാര്യ നിലവിൽ താമസിക്കുന്ന സ്ഥലത്തെ കുടുംബകോടതിയിലും വിവാഹമോചന ഹർജി സമർപ്പിക്കാമെന്നും കോടതി വ്യക്തമാക്കി.

​ഭാര്യയുടെ താമസം എവിടെയാണോ അവിടുത്തെ കുടുംബകോടതിക്ക് കേസ് പരിഗണിക്കാൻ പൂർണ്ണ അധികാരമുണ്ടെന്ന് നിരീക്ഷിച്ച കോടതി, ക്രിസ്ത്യൻ സ്ത്രീകൾക്ക് ഈ അവകാശം നിഷേധിക്കുന്നത് വിവേചനപരവും ഭരണഘടനാ വിരുദ്ധവുമാണെന്ന് ചൂണ്ടിക്കാട്ടി. ഹിന്ദു വിവാഹ നിയമത്തിലും സ്പെഷ്യൽ മാര്യേജ് ആക്ടിലുമുള്ള ഈ ആനുകൂല്യം ക്രിസ്ത്യൻ സ്ത്രീകൾക്കും ഒരുപോലെ ബാധകമാണെന്ന് കോടതി ഉത്തരവിൽ വ്യക്തമാക്കി. വയനാട് സ്വദേശിനി നൽകിയ അപ്പീൽ പരിഗണിച്ചാണ് ഹൈക്കോടതിയുടെ ഈ സുപ്രധാന വിധി.