മുല്ലപ്പെരിയാര്‍ ഡാം തര്‍ക്കം: സുപ്രീംകോടതിയില്‍ സ്പെഷ്യല്‍ കോണ്‍സലിനെ നിയോഗിച്ച് കേരളം

പത്തനംതിട്ട: മുല്ലപ്പെരിയാർ ഡാം തർക്കവുമായി ബന്ധപ്പെട്ട് സുപ്രീംകോടതിയിൽ സംസ്ഥാന സർക്കാരിനായി ഹാജരാകാൻ സ്പെഷ്യൽ കോൺസലിനെ നിയോഗിച്ചു. മുതിർന്ന അഭിഭാഷകൻ റോയ് എബ്രഹാമിനെയാണ് സ്പെഷ്യൽ കോൺസലായി നിയമിച്ചിരിക്കുന്നത്. മുല്ലപ്പെരിയാറിന് പുറമെ കേരളവുമായി ബന്ധപ്പെട്ട മറ്റ് അന്തർ സംസ്ഥാന നദീജല തർക്ക കേസുകളിലും ട്രിബ്യൂണലുകളിലും റോയ് എബ്രഹാം സംസ്ഥാനത്തെ പ്രതിനിധീകരിക്കും.

​സീനിയർ അഭിഭാഷകൻ മോഹൻ കതാർക്കിക്കൊപ്പമാകും റോയ് എബ്രഹാം കേസുകളിൽ ഹാജരാകുകയെന്ന് സർക്കാർ ഉത്തരവിൽ വ്യക്തമാക്കുന്നു. എറണാകുളം കൂത്താട്ടുകുളം സ്വദേശിയായ അദ്ദേഹം 1992 മുതൽ സുപ്രീംകോടതിയിൽ പ്രാക്ടീസ് ചെയ്തുവരികയാണ്.

​രണ്ടാം പിണറായി വിജയൻ സർക്കാരിന്റെ കാലത്ത് മുല്ലപ്പെരിയാർ ഉൾപ്പെടെയുള്ള വിഷയങ്ങളിൽ ഹാജരായിരുന്നത് മുൻ സ്റ്റാൻഡിങ് കൗൺസിൽ ജി. പ്രകാശായിരുന്നു. ലാവലിൻ കേസിലടക്കം സംസ്ഥാന സർക്കാരിനായി ഹാജരായ ജി. പ്രകാശിനെ മാറ്റിയതായി പുതിയ ഉത്തരവിൽ നേരിട്ട് വ്യക്തമാക്കുന്നില്ലെങ്കിലും, ഇത് പകരമുള്ള നിയമനമാണെന്നാണ് സൂചന.