മാവൂരിൽ നിയന്ത്രണംവിട്ട കാർ കടകളിലേക്ക് പാഞ്ഞുകയറി മറിഞ്ഞു; മൂന്നുപേർക്ക് പരിക്ക്

മാവൂർ: മാവൂർ-കോഴിക്കോട് റോഡിൽ പാറമ്മൽ അങ്ങാടിയിൽ നിയന്ത്രണംവിട്ട കാർ കാൽനടയാത്രക്കാരനെ ഇടിച്ചുവീഴ്ത്തി കടകളിലേക്ക് പാഞ്ഞുകയറി മൂന്നുപേർക്ക് പരിക്കേറ്റു. പാറമ്മൽ സ്വദേശികളായ വായോളി അഹമ്മദ് (63), കട ഉടമ പുല്ലിൽതൊടി പി.ടി. മുഹമ്മദ് (63), കാർ യാത്രക്കാരി കുനിയിൽ സ്വദേശി ഫാത്തിമ ഷബിൻ എന്നിവർക്കാണ് പരിക്കേറ്റത്. തിങ്കളാഴ്ച രാത്രി പതിനൊന്നോടെയായിരുന്നു അപകടം.

​കോഴിക്കോട് ഭാഗത്തുനിന്ന് കുനിയിലിലേക്ക് പോവുകയായിരുന്ന ഇന്നോവ കാറാണ് അപകടത്തിൽപ്പെട്ടത്. ജോലി കഴിഞ്ഞ് റോഡരികിലൂടെ നടന്നുപോകുകയായിരുന്ന അഹമ്മദിനെ ഇടിച്ചുതെറിപ്പിച്ച കാർ, സമീപത്തെ ബിസ്മി ബുക്ക് സ്റ്റാളിലേക്കും സി.എം. ചിക്കൻ സ്റ്റാളിലേക്കും പാഞ്ഞുകയറുകയായിരുന്നു. ഇടിയുടെ ആഘാതത്തിൽ ഇരു കടകളും പൂർണമായി തകരുകയും കാർ റോഡിലേക്ക് തലകീഴായി മറിയുകയും ചെയ്തു.

​അപകടവിവരമറിഞ്ഞെത്തിയ മാവൂർ പോലീസും ഫയർഫോഴ്സും ചേർന്നാണ് കാറിലുണ്ടായിരുന്നവരെ പുറത്തെടുത്തത്. പരിക്കേറ്റവരെ കോഴിക്കോട് മെഡിക്കൽ കോളേജ് ആശുപത്രിയിലും തുടർന്ന് സ്വകാര്യ ആശുപത്രിയിലും പ്രവേശിപ്പിച്ചു. അപകടത്തെത്തുടർന്ന് മാവൂർ-കോഴിക്കോട് റോഡിൽ തടസ്സപ്പെട്ട ഗതാഗതം ക്രെയിൻ ഉപയോഗിച്ച് വാഹനം നീക്കിയ ശേഷമാണ് പുനഃസ്ഥാപിച്ചത്.